६ जेठ,काठमाडौं : राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले राजसंस्थाको पुन:स्थापनाको आन्दोलन एकैपटकमा पूरा नहुने बताएका छन्।
मंगलबार काठमाडौंमा आयोजित एक कार्यक्रममा बोल्दै अध्यक्ष लिङ्देनले राज्यसत्ता विरुद्ध सुरु गरिएको परिवर्तनको लडाइँ दीर्घकालीन योजना, रणनीति र जनसमर्थनका साथ अघि बढाउनु पर्नेमा जोड दिए।
“हाम्रो चाहनाले मात्र राजा फर्कन्छ भन्ने होइन,” उनले भने, “यदि मेरो हातमा शक्ति भएको भए आजै सत्ता फेरिएर राजा नारायणहिटी फर्कन्थे। तर त्यो यति सहज छैन। त्यसैले योजना र रणनीति आवश्यक छ।”
लिङ्देनले विगतमा भएका ठूला राजनीतिक परिवर्तनहरू पनि चुनाव मार्फत नभई जनताको आन्दोलन बाटै सम्भव भएको उल्लेख गर्दै हालको आन्दोलन पनि सोही धारमा अघि बढिरहेको स्पष्ट पारे।
“०७ साल देखि ०६२/६३ साल सम्म भएका कुनै पनि ठूला परिवर्तनहरू चुनाव बाट आएका होइनन्,” उनले भने, “अहिलको परिवर्तन पनि जनताको आवाज बाटै सम्भव हुन्छ भन्ने सोचका साथ हामी अघि बढिरहेका छौं।”
उनले प्रदर्शन र घेराउलाई आन्दोलनको मूल विधि मानेर आफ्नो अभियान अघि बढाइरहेको बताए। साथै, उनले राजसंस्थाको पुन:स्थापना सहमतिको आधारमा पनि सम्भव हुने विश्वास व्यक्त गरे।
“राजसंस्था देखि अहिलेका सबै राजनीतिक शक्तिहरू लाई समेटेर देशको निकास खोज्न सकिन्छ,” लिङ्देनले भने, “समझदारीका साथ अगाडि बढेमा स्थायित्व र समाधान सम्भव छ।”
आफ्नो प्रतिकृया दिनुहोस्