१३ साउन,जनकपुरधाम । नेपाल विद्युत प्राधिकरणका कार्यकारी निर्देशक हितेन्द्रदेव शाक्यले मधेश प्रदेशका किसानहरूलाई सिँचाइको सुविधा उपलब्ध गराउने उद्देश्यले डिप बोरिङ जडानको तयारी तत्काल शुरु गर्न निर्देशन दिएका छन्।
मंगलबार जनकपुरधाम स्थित प्रादेशिक वितरण केन्द्रमा आयोजित बैठकमा उनले विभिन्न जिल्लाका वितरण केन्द्र प्रमुखहरू सँग छलफल गर्दै सात दिन भित्र आवश्यक गृहकार्य पूरा गर्न निर्देशन दिए। सिँचाइको मुख्य समय अब केवल एक महिना मात्र बाँकी रहेको उल्लेख गर्दै शाक्यले स्थान छनोट, ट्रान्सफर्मर जडान लगायतका कामलाई तीव्रता दिन आग्रह गरे।
शाक्यले किसानहरूले माग गर्नु अघि नै सम्बन्धित स्थानीय तह र निकाय सँग समन्वय गरी बोरिङ जडान गरि सक्नु पर्नेमा जोड दिए। आवश्यक परेमा सीमावर्ती क्षेत्र बाट अतिरिक्त ट्रान्सफर्मर ल्याउने व्यवस्था पनि मिलाइने जानकारी दिए।
बोरिङ जडान पछिको विद्युत सेवा न्यूनतम शुल्कमा उपलब्ध गराइने शाक्यले स्पष्ट पारे। “८ रुपैयाँमा खरिद गरिएको बिजुली निःशुल्क दिन सकिन्न, तर न्यूनतम शुल्क लिएर सेवा दिने व्यवस्था मिलाइन्छ,” उनले भने। यस सम्बन्धमा स्थानीय तह र सरोकारवाला निकायसँग सहकार्य गर्दै शुल्क असुलीको प्रक्रिया पनि अघि बढाइने उनले बताए।
आफ्नो प्रतिकृया दिनुहोस्