जनकपुरधाम । मधेश प्रदेशमा नयाँ सरकार गठनसँगै लोकतान्त्रिक समाजवादी पार्टी (लोसपा)का नेता जितेन्द्र प्रसाद सोनलले आज मुख्यमन्त्री पद तथा गोपनीयताको शपथ ग्रहण गरेका छन् ।
आज प्रदेश प्रमुख कार्यालयमा आयोजित एक विशेष समारोहमा प्रदेश प्रमुख सुमित्रा सुवेदी भण्डारीले मुख्यमन्त्री सोनललाई शपथ ग्रहण गराएकी हुन् । सोही अवसरमा दुई जना बिना विभागीय मन्त्री जनमत पार्टीका महेश यादव र नेकपा (एकीकृत समाजवादी)का कनिस पटेलले पनि पद तथा गोपनीयताको शपथ लिएका छन् । उनीहरूको मन्त्रालय पछि तोकिने बताइएको छ ।
सोनललाई बुधबार साँझ प्रदेश प्रमुख भण्डारीले संविधानको धारा १६८(२) बमोजिम मुख्यमन्त्रीमा नियुक्त गरेकी थिइन् । उनले बुधबार बिहान सरकार गठनका लागि दाबी पेश गरेका थिए, जसमा जसपा नेपालका १९, जनमत पार्टीका १३, माओवादी केन्द्रका ९, लोसपाका ८ र नेकपा (एस)का ७ जना सांसदको समर्थन रहेको उल्लेख थियो । यो समर्थन प्रदेश सभाको बहुमतका लागि आवश्यक ५४ भन्दा दुई बढी हो ।
बारा–४ (ख) बाट निर्वाचित सोनल यसअघि मधेश प्रदेशका भौतिक पूर्वाधार मन्त्रीका रूपमा कार्यरत थिए । आठ वर्षको अवधिमा उनी प्रदेशका चौथो मुख्यमन्त्री बनेका हुन् ।
स्रोतका अनुसार सोनल नेतृत्वको गठबन्धनमा जसपालाई चार, जनमत पार्टीलाई तीन, माओवादी केन्द्रलाई दुई, लोसपा र नेकपा (एस)लाई एक–एक मन्त्रालय दिने सहमति भएको छ । यसअघि मुख्यमन्त्री रहेका जनमत पार्टीका सतिश कुमार सिंहले समर्थन फिर्ता गर्दै पदबाट राजीनामा दिएका थिए, जसपछि नयाँ सरकार गठनको प्रक्रिया अघि बढाइएको हो ।
आफ्नो प्रतिकृया दिनुहोस्