१६ माघ,सर्लाही । सर्लाही जिल्लाका १२ वटा स्थानीय तहमा हात्तीपाइले (फाइलेरिया) रोग पुन: सक्रिय रूपमा फैलिएको पुष्टि भएपछि स्वास्थ्य निकायले व्यापक औषधि सेवन अभियान सुरु गरेको छ। जोखिम देखिएका क्षेत्रहरूमा विशेष निगरानी सहित घरघरमै पुगेर औषधि खुवाउने तयारी गरिएको जिल्ला स्वास्थ्य कार्यालय सर्लाहीले जनाएको छ।
स्वास्थ्य कार्यालयका अनुसार विश्व स्वास्थ्य सङ्गठन (डब्लुएचओ) र इपिडिमियोलोजी तथा रोग नियन्त्रण महाशाखाले गत असोज महिनामा सर्लाहीका सबै २० वटै पालिकामा नमूना सङ्कलन गरी परीक्षण गरेको थियो। परीक्षणको नतिजा अनुसार जिल्लाको दक्षिणी क्षेत्रका १२ पालिकामा हात्तीपाइलेको संक्रमण अझै सक्रिय अवस्थामा रहेको देखिए पछि पुन: औषधि खुवाउने निर्णय गरिएको हो।
बलरा नगरपालिका, रामनगर गाउँपालिका, धन्कौल गाउँपालिका, बसवरिया गाउँपालिका, चक्रघट्ट गाउँपालिका, गोडैता नगरपालिका, विष्णु गाउँपालिका, कौडेना गाउँपालिका, मलङ्गवा नगरपालिका, ब्रह्मपुरी गाउँपालिका, पर्सा गाउँपालिका र हरिपुर्वा नगरपालिकामा गरिएको परीक्षणका क्रममा ३०० नमूना मध्ये २८ जनामा हात्तीपाइलेको सङ्क्रमण पुष्टि भएको थियो। तीमध्ये राति सङ्कलन गरिएका नमूनामा पाँच जनामा सक्रिय संक्रमण भेटिएको स्वास्थ्य कार्यालयले जनाएको छ।
जिल्लाका उत्तरी भेगका बाँकी आठ पालिकामा भने रोग फैलिने क्रम नियन्त्रणमा आएको बताइएको छ। अभियानलाई प्रभावकारी बनाउन प्रारम्भिक चरणमा स्वास्थ्यकर्मी तथा महिला स्वास्थ्य स्वयं सेविकालाई तालिम दिइँदैछ। तालिमपछि उनीहरू घरघरमै पुगेर औषधि खुवाउनेछन्।
मलङ्गवा नगरपालिकामा माघ ८ गतेदेखि औषधि खुवाउने अभियान सुरु भइसकेको छ भने अन्य पालिकामा तालिम तथा तयारी कार्य जारी रहेको जनाइएको छ। हात्तीपाइले विरुद्धको औषधि दुई वर्ष भन्दा माथिका सबै नागरिकलाई खुवाइने छ।
यस अभियान मार्फत १२ पालिकाका करिब ८० प्रतिशत जनसंख्या अर्थात् ४ लाख ३० हजार ९४१ नागरिकलाई औषधि खुवाउने लक्ष्य लिइएको जिल्ला स्वास्थ्य कार्यालयले जनाएको छ।
आफ्नो प्रतिकृया दिनुहोस्