१२ फागुन,जनकपुर: बिहानको समयलाई स्वस्थ जीवनशैलीको मेरुदण्ड मानिन्छ । तर धेरै मानिसले अपनाउने केही दैनिक बिहानका बानीहरू नै दीर्घकालीन रूपमा स्वास्थ्यका लागि हानिकारक बन्न सक्ने स्वास्थ्य विज्ञहरूले चेतावनी दिएका छन् ।
विज्ञहरूका अनुसार दिनको सुरुवात कस्तो हुन्छ भन्ने कुराले शारीरिक मात्र होइन, मानसिक स्वास्थ्यमा पनि गहिरो प्रभाव पार्छ । विश्व स्वास्थ्य संगठन (डब्लुएचओ) लगायत विभिन्न स्वास्थ्य संस्थाका अध्ययनहरूले अस्वस्थ बिहानका बानीहरूले मुटुरोग, मधुमेह, तनाव तथा मोटोपना जस्ता समस्या बढाउने देखाएका छन् ।
उठ्ने बित्तिकै मोबाइल चलाउने बानी
धेरैजसो मानिस बिहान आँखा खुल्नेबित्तिकै मोबाइल फोनमा व्यस्त हुने गर्छन् । यसले आँखामा अत्यधिक तनाव पर्नुका साथै मस्तिष्कलाई एकाएक सूचना चापमा पार्छ । यस्तो बानीले चिन्ता, मानसिक थकान र ध्यान केन्द्रित गर्न कठिनाइ उत्पन्न गर्न सक्छ ।
बिहान पानी नपिउने
रातभर सुत्दा शरीर स्वाभाविक रूपमा डिहाइड्रेसन अवस्थामा पुग्छ । उठ्ने बित्तिकै पानी नपिउँदा पाचन प्रणाली सुस्त हुने, विषाक्त पदार्थ बाहिर निकाल्ने प्रक्रिया ढिलो हुने र थकान महसुस हुने समस्या देखिन सक्छ ।
नास्ता नगर्ने वा ढिलो गर्ने
नास्तालाई दिनको सबैभन्दा महत्वपूर्ण भोजन मानिन्छ । बिहान खाना नखाँदा शरीरमा ऊर्जा कमी हुनुका साथै रक्तचाप असन्तुलन, टाउको दुखाइ र चिडचिडापन देखिन सक्छ । दीर्घकालमा यसले मधुमेह र मोटोपनाको जोखिम बढाउने विज्ञहरूको भनाइ छ ।
खाली पेटमा अत्यधिक चिया–कफी सेवन
बिहान खाली पेटमा धेरै चिया वा कफी पिउँदा एसिडिटी, ग्यास्ट्रिक समस्या र मुटुसम्बन्धी जोखिम बढ्न सक्छ । यसले पेट पोल्ने, मुड बिग्रने र शरीरमा निर्जलीकरण समेत गराउन सक्छ ।
शारीरिक गतिविधि नगर्ने बानी
बिहानको समयमा हल्का व्यायाम, हिँडडुल वा स्ट्रेचिङ नगर्दा शरीर सुस्त हुने, तौल बढ्ने र मानसिक ताजगी नआउने समस्या देखिन्छ । नियमित शारीरिक गतिविधिले शरीरलाई सक्रिय बनाउनुका साथै मानसिक स्वास्थ्यमा पनि सकारात्मक असर पार्ने विज्ञहरू बताउँछन् ।
स्वास्थ्यकर्मीहरूका अनुसार बिहान उठ्ने बित्तिकै पानी पिउने, मोबाइल प्रयोग सीमित गर्ने, हल्का व्यायाम गर्ने, पौष्टिक नास्ता खाने र सकारात्मक सोचका साथ दिन सुरु गर्ने बानीले दीर्घकालीन रूपमा स्वस्थ जीवनशैली कायम गर्न महत्वपूर्ण भूमिका खेल्दछ ।
आफ्नो प्रतिकृया दिनुहोस्