२२ माघ ,काठमाडौं । निर्देशक सुदीप भूपाल सिंहको निर्देशनमा बनेको नयाँ नेपाली सिनेमा ‘श्री बुकुरो : द होम कलिङ’ को रोमान्टिक पोस्टर सार्वजनिक गरिएको छ। आधिकारिक ट्रेलर सार्वजनिक हुनु अघि नै सार्वजनिक गरिएको पोस्टरमा अभिनेता आशीर्वाद बी क्षेत्री र अभिनेत्री निकिता आचार्य गहिरो प्रेमभावमा प्रस्तुत भएका छन्।
पोस्टरले फिल्ममा केन्द्रित प्रेमकथालाई भावनात्मक रूपमा उजागर गर्ने संकेत गरेको छ। यस सिनेमा मार्फत निर्देशक सिंह करिब सात वर्ष पछि निर्देशनमा पुनरागमन गर्दैछन्। यसअघि उनले चर्चित चलचित्र ‘माला’ र ‘रुद्रप्रिया’ निर्देशन गरेका थिए।
रेञ्ज ब्यानर अन्तर्गत निर्माण भएको यो पारिवारिक कथावस्तुमा आधारित चलचित्रमा आशीर्वाद क्षेत्री, लक्ष्मी गिरी, निकिता आचार्य, प्रतीक राज आचार्य, रोशनी कार्की, राजन इशान, दीपिका थापा, लय संग्रौला, मोहन निरौला, रामबाबु रेग्मी, रश्मि भट्ट, उत्तम केसी, गीता थापा, सपना श्रेष्ठ, आशिका शाही, दीपक कार्की र रजिना विश्वकर्मा लगायत कलाकारहरूको अभिनय रहेको छ।
चलचित्रको कथा तथा पटकथा निर्देशक सुदीप भूपाल सिंह स्वयंले लेखेका हुन् भने रुबी सेन सिंह निर्माता रहेकी छन्। छायांकन सञ्जय लामा र राजेश श्रेष्ठले गरेका छन्। फिल्मको छायांकन मुस्ताङ, बागलुङ, कास्की, दमौली, मकवानपुर र काठमाडौं लगायत विभिन्न स्थानमा गरिएको हो। चलचित्रमा संगीतकार रनजीत गजमेर र बसन्त सापकोटाको संगीत समावेश रहेको छ।
आफ्नो प्रतिकृया दिनुहोस्