२८ माघ ,(एजेन्सी) : चेक अनादर (चेक बाउन्स) सम्बन्धी मुद्दामा अभिनेता राजपाल यादव तिहार जेल चलान भएपछि बलिउडका कलाकारहरू उनको समर्थनमा उभिन थालेका छन्। यस कठिन घडीमा राजपाललाई सहयोग गर्न अभिनेता गुरमीत चौधरी र सोनु सूदले अग्रसरता देखाउँदै मानवता र कलाकारिताको नाताले साथ दिने प्रतिबद्धता जनाएका हुन्। गत फेब्रुअरी ५ मा अदालतको आदेश पालना गर्दै जेलमा आत्मसमर्पण गरेका राजपालका लागि गुरमीतले सामाजिक सञ्जाल ‘एक्स’ मार्फत एक भावुक सन्देश लेख्दै सम्पूर्ण फिल्म उद्योगलाई एकजुट हुन र आफ्ना सहकर्मीलाई संकटमा एक्लो नछोड्न आग्रह गरेका छन्।
राजपाल यादवले जेल जानुअघि सार्वजनिक गरेको आफ्नो गम्भीर आर्थिक संकट सम्बन्धी भिडियोले धेरैको ध्यान तानेको थियो। सोही सन्दर्भलाई लिएर अभिनेता सोनु सूदले राजपालको सम्मान जोगाउनका लागि महत्वपूर्ण घोषणा गरेका छन्। सोनुले राजपाललाई आफ्नो आगामी चलचित्रमा अभिनयको अवसर दिने मात्र नभई, तत्कालै आर्थिक राहत पुगोस् भन्ने उद्देश्यले ‘साइनिङ रकम’ समेत उपलब्ध गराउने बताएका छन्। सोनुले यस सहयोगलाई ‘च्यारिटी’ भन्नुको सट्टा एक प्रतिभावान कलाकारको सम्मान भएको र उद्योगले आफ्नो परिवारका सदस्यलाई दुखमा साथ दिनुपर्ने धारणा राखेका छन्।
कानुनी पाटोलाई हेर्दा, दिल्ली उच्च अदालतले राजपाल यादवलाई पटक-पटक भुक्तानीका लागि समय दिए पनि उनले ती प्रतिबद्धताहरू उल्लंघन गरेपछि अदालत कठोर बनेको थियो। राजपालका वकिलले २५ लाख भारु तुरुन्तै जम्मा गर्ने र बाँकी रकम किस्तामा बुझाउने प्रस्ताव गरे पनि अदालतले त्यसलाई अस्वीकार गर्दै फेब्रुअरी ४ भित्रै आत्मसमर्पण गर्न अन्तिम निर्देशन दिएको थियो। अन्ततः कुनै विकल्प नरहेपछि फेब्रुअरी ५ मा उनले जेलमा आत्मसमर्पण गरेका हुन्। यस घटनाले बलिउडमा कलाकारहरूको आर्थिक सुरक्षा र आपसी सहयोगको विषयलाई लिएर पुनः एकपटक बहस छेडिदिएको छ।
आफ्नो प्रतिकृया दिनुहोस्