२९ माघ ,काठमाडौं ।फागुन १ गतेबाट प्रदर्शनमा आउन लागेको प्रतिक्षित सिनेमा ‘श्री बुकुरो: द होम कलिङ’ को बुधबार राजधानीको बिग मुभिजमा भव्य प्रिमियर शो सम्पन्न भएको छ। निर्माण टिमले आयोजना गरेको उक्त विशेष प्रदर्शनमा वरिष्ठ निर्देशक तुलसी घिमिरे, निर्माता छविराज ओझा, दीपक प्रसाद आचार्य र जयकिशन बस्नेत लगायत चलचित्र क्षेत्रका हस्ती तथा पत्रकारहरूको बाक्लो उपस्थिति रहेको थियो। प्रिमियरमा उपस्थित चलचित्रकर्मीहरूले सिनेमाको कथावस्तु र निर्माण पक्षको खुलेर प्रशंसा गरेका छन्।
सिनेमा हेरेपछि वरिष्ठ निर्देशक तुलसी घिमिरेले यसलाई एउटा जीवन्त ‘पेन्टिङ’ को संज्ञा दिँदै मानवीय संवेदनाका सूक्ष्म पलहरूलाई पर्दामा निकै कलात्मक ढंगले उतारिएको टिप्पणी गर्नुभयो। उहाँले विशेष गरी फुपु र भदैको बुढेसकालको भेट र लोभी मामाको चरित्र जस्ता प्रसङ्गले कथालाई वास्तविक बनाएको बताउँदै आमालाई साथ दिने तीन छोराहरूको भूमिकाको समेत उच्च प्रशंसा गर्नुभयो। त्यस्तै, निर्माता तथा वितरक छविराज ओझाले पनि ‘श्री बुकुरो’ उत्कृष्ट बनेको प्रतिक्रिया दिँदै यसले दर्शकको मन जित्ने विश्वास व्यक्त गर्नु भयो।
सुदीप भुपाल सिंहको लेखन तथा निर्देशनमा तयार भएको यो सिनेमाले घर, परिवार र समाजको यथार्थपरक कथालाई समेटेको छ। पारिवारिक सम्बन्धका जटिलता र प्रेम जीवनमा चिना नमिल्दा आउने अड्चनहरूलाई यसमा मुख्य विषय बनाइएको छ। वरिष्ठ अभिनेत्री लक्ष्मी गिरीको मुख्य भूमिका रहेको यस फिल्ममा आशीर्वाद बी क्षेत्री, निकिता आचार्य, रोशनी कार्की, राजन इशान, लय संग्रौला र मोहन निरौला लगायतका कलाकारहरूको सशक्त अभिनय देख्न सकिन्छ।
आफ्नो प्रतिकृया दिनुहोस्