१५ भाद्र,जनकपुरधाम :सडक अतिक्रमण हटाउने क्रममा जनकपुरधाम उप-महानगरपालिकाबाट खटिएका नगर प्रहरीलाई सत्तु पसल गरिरहेका एक ठेला व्यापारीले हातपात र दुर्व्यवहार गरेका छन्। भानु चौकको व्यस्त सडकमा ठेला माथि सत्तुको पसल लगाई व्यापार गर्ने वडा नं.१६ का मनोज साहले नगर प्रहरी माथि आक्रमित व्यवहार गरेको हो। मनोज साहको ठेलाबाट बाटो आवत जावत गर्ने सवारी साधन लगायत पैदल यात्रु समेतलाइ व्यवधान भएको स्थानीयहरुबाट उजुरी आएपछि नगर प्रहरी इन्चार्ज नितेश कुमार रायले ठेला व्यापारी मनोज साहलाई सम्झाई बुझाई फर्केका थिए।
तैपनि अटेर गरि सो स्थानबाट ठेला नहटाई ठेलामा सत्तु पसल यथावतनै राखेका साहलाई नगर प्रहरीका टिमले पुन:ठेला हटाउन भने पछि विवाद चर्केको खण्डमा आक्रोसित अतिक्रमणकारीले नगर प्रहरी मनोज राना मगर तथा रंजित राय माथि हातपात, कठालो समाती कुटपिट र लछार पछार गरी सरकारी काम कारवाही गर्न नदिएको नगर प्रहरी इन्चार्ज रायले बताएका छन् ।
गालि गलौज तथा आक्रमणको व्यवहारबाट नगर प्रहरीको वर्दी च्यातिए पछि अभद्रकारी साहलाई कानुनी कारवाहीको लागि जिल्ला प्रहरी कार्यालयमा पठाइएको उप-महानगरपालिकाले जनाएको छ । आक्रमणकारी साह माथि कारवाही गर्न उप- महानगरपालिकाले प्रहरी र प्रशासनमा उजुरी समेत हाल्ने तयारि गरेको छ।
आफ्नो प्रतिकृया दिनुहोस्