३२ असार,जनकपुरधाम, मधेश प्रदेश ।वीरगंज सहित विभिन्न स्थानहरूमा बढ्दो खानेपानी संकट समाधानका लागि मधेश प्रदेश सरकारले तत्कालीन राहत उपाय स्वरूप विशेष पहल थालेको छ। पानीको अभावका कारण जनजीवन प्रभावित भइरहेका बेला प्रदेश सरकारले आफ्नो स्वामित्वमा रहेका बारुण यन्त्र (फायर ब्रिगेड) र टयांकर परिचालन गरी प्रभावित क्षेत्रमा पानी आपूर्ति सुरु गरेको हो।
प्रदेश विपद् व्यवस्थापन कार्यकारी समितिको निर्णय अनुसार बुधबार (आज) प्रदेश सरकारले आफ्ना ८ वटा वारुणयन्त्रहरू खानेपानी संकटबाट अति प्रभावित क्षेत्रमा खटाएको छ।
मुख्यमन्त्री सतिश कुमार सिंहका अनुसार, एक बारुण यन्त्रले ५ हजार लिटर पानी वहन गर्न सक्छ। ८ वटा बारुण यन्त्र बाट एक पटकमा ४० हजार लिटर पानी प्रभावित क्षेत्रमा पुर्याउन सकिने छ। “खानेपानी समस्या समाधानमा सरकार पूर्ण रूपमा क्रियाशील छ,” मुख्यमन्त्री सिंहले बताएका छन्।
प्रदेश सरकारको व्यवस्थापनमा रहेका ती बारुण यन्त्रहरू नेपाली सेनाले संचालन गर्नेछ, र ती २४ सै घण्टा निरन्तर प्रभावित क्षेत्रमा खटिने छन्। यस अघि पनि प्रदेश सरकारले वन कार्यालय अन्तर्गतका ३ वटा टयांकर मार्फत केही क्षेत्रमा खानेपानी आपूर्ति गरिसकेको छ।
मुख्यमन्त्री सिंहले जनाए अनुसार, आगामी दिनमा अन्य प्रभावित क्षेत्रहरूमा पनि थप सहयोग पुर्याउने उद्देश्यले ७ वटा टयांकर र थप १ वटा बारुण यन्त्र नेपाली सेनाको सहकार्यमा पठाउने तयारी भइरहेको छ।
सुक्खा र खानेपानी संकटका कारण समस्यामा परेका नागरिकहरूको पीडामा सरकार साथमा रहेको उल्लेख गर्दै उनले भने, “नागरिकको समस्या समाधान प्रदेश सरकारको प्रमुख प्राथमिकता हो।”
साथै, उनले प्रदेश सरकारले संघीय सरकार, स्थानीय सरकारहरू र मानवीय सहायतामा संलग्न दातृ निकायहरू सँग समन्वय गर्दै उपलब्ध स्रोत-साधनको अधिकतम प्रयोग गरी समस्या समाधानमा प्रयत्नशील रहेको स्पष्ट पारे।
आफ्नो प्रतिकृया दिनुहोस्