१६ फागुन, (एजेन्सी): इजरायलले शनिबार इरानविरुद्ध पूर्वसावधानी स्वरूप क्षेप्यास्त्र आक्रमण सुरु गरेको जनाएको छ । सुरक्षा जोखिम बढेपछि देशभर सायरन बजाइएको र नागरिकलाई सुरक्षित आश्रयस्थलमा बस्न निर्देशन दिइएको अन्तर्राष्ट्रिय सञ्चारमाध्यमहरूले उल्लेख गरेका छन् ।
इजरायली रक्षामन्त्री इस्रायल काट्जले इरानबाट हुन सक्ने सम्भावित आक्रमणलाई निष्क्रिय पार्न पूर्वआक्रमण गरिएको बताएका छन् । इजरायली रक्षा बल (आईडीएफ)ले सुरक्षा सतर्कता उच्च बनाउँदै सर्वसाधारणलाई सुरक्षित स्थान नजिकै बस्न र सरकारी निर्देशन पालना गर्न आग्रह गरेको छ । केही सुरक्षा स्रोतलाई उद्धृत गर्दै विदेशी सञ्चारमाध्यमहरूले अमेरिकाको सीमित सहकार्य रहेको दाबी गरेका छन्, यद्यपि यसबारे औपचारिक पुष्टि भएको छैन ।
यसैबीच, इरानी अधिकारीहरू लाई उद्धृत गर्दै अन्तर्राष्ट्रिय समाचार एजेन्सीहरूले इरानका सर्वोच्च नेता आयातोल्लाह अली खामेनीलाई राजधानी तेहरानबाट सुरक्षित स्थानमा सारिएको जनाएका छन् । तेहरानका विभिन्न क्षेत्रमा विस्फोटको आवाज सुनिएको र केही भागमा मोबाइल तथा इन्टरनेट सेवा प्रभावित भएको इरानी सरकारी सञ्चारमाध्यमहरूले रिपोर्ट गरेका छन् ।
आईडीएफले सुरक्षा मूल्याङ्कनपछि ‘होम फ्रन्ट कमान्ड’ निर्देशिका संशोधन गर्दै देशभर ‘पूर्ण गतिविधि’ अवस्थाबाट ‘आवश्यक गतिविधि’मा रूपान्तरण गरेको जनाएको छ । शैक्षिक संस्था, सार्वजनिक जमघट तथा गैरआवश्यक कार्यालयहरू अस्थायी रूपमा बन्द गरिएका छन् । रक्षामन्त्री काट्जले नागरिक सुरक्षा ऐनअन्तर्गत देशव्यापी विशेष आपतकाल घोषणा गर्दै मिसाइल र ड्रोन आक्रमणको सम्भावनाबारे चेतावनी दिएका छन् ।
उता, अमेरिकामा आयोजित एक कार्यक्रममा अमेरिकी राष्ट्रपति डोनाल्ड ट्रम्पले इरानलाई “कठिन र खतरनाक राष्ट्र”को संज्ञा दिँदै परमाणु वार्तामा ठोस र अर्थपूर्ण निर्णय आवश्यक रहेको बताएका थिए । इरान र अमेरिका बीच हालै जेनेभामा तेस्रो चरणको वार्ता सम्पन्न भएको थियो भने आगामी चरणको वार्ताको तयारी जारी रहेको बताइएको छ ।
मध्यपूर्वमा बढ्दो सैन्य तनाव बीच इजरायल–इरान द्वन्द्व थप चर्किने संकेत देखिएको छ । अन्तर्राष्ट्रिय समुदायले संयम अपनाउन र कूटनीतिक पहल मार्फत समाधान खोज्न आग्रह गरिरहेको छ ।
आफ्नो प्रतिकृया दिनुहोस्