७ चैत : काठमाडौंको ठमेल स्थित चर्चित क्लब ‘एलओडी’ (LOD) मा आगामी अप्रिल ८, २०२६ का दिन एउटा भव्य साङ्गीतिक उत्सव आयोजना हुने भएको छ, जसले दर्शकलाई सन् ९० को दशकको सुमधुर संगीतको युगमा फर्काउने छ। म्याड इन्टरटेनमेन्टको आयोजनामा हुन लागेको यस विशेष कार्यक्रममा बलिउडका दिग्गज गायक विनोद राठोड र नेपाली पप संगीतका चर्चित तारा अनीश ओकेलीले पहिलो पटक एउटै मञ्च साझा गर्दैछन्।
बलिउडका सुपरस्टारहरू शाहरुख खान, सलमान खान र सञ्जय दत्तका लागि कैयौँ कालजयी गीतहरूमा स्वर दिइसकेका राठोडले उक्त साँझ ‘बाजीगर’ र ‘दिवाना’ जस्ता चलचित्रका चर्चित गीतहरू ‘ऐसी दीवानगी’ र ‘छुपाना भी नही आता’ मार्फत दर्शकलाई मन्त्रमुग्ध पार्नेछन्। उनीसँगै नेपाली युवा पुस्ताका प्रिय गायक अनीश ओकेलीले आफ्ना हिट गीतहरू ‘मेरी ओकेली’ र ‘गुलाबी जादू’ बाट दर्शकलाई झुमाउने तयारी गरेका छन्।
आयोजक संस्थाका संस्थापक मनिष अधिकारीका अनुसार साँझ ८ बजेदेखि सुरु हुने यो कार्यक्रम प्राविधिक रूपमा पनि निकै उत्कृष्ट हुनेछ। विश्वका उत्कृष्ट १०० क्लबहरूको सूचीमा ४४औँ स्थानमा रहेको एलओडीमा ३६० डिग्री स्टेज भ्यु र अत्याधुनिक ‘डीएनबी’ अडियोटेक्निक साउन्ड सिस्टमको प्रयोग गरिनेछ।
अधिकारीले यो साङ्गीतिक साँझ नेपालका लागि एउटा दुर्लभ र अविस्मरणीय अनुभव हुने दाबी गरेका छन्, जहाँ दुई फरक देशका साङ्गीतिक हस्तीहरूले एउटै मञ्चबाट संगीत प्रेमीहरूलाई जादुमयी अनुभूति दिलाउनेछन्।
आफ्नो प्रतिकृया दिनुहोस्