११मंसिर,जनकपुरधाम: शहरी विकासमन्त्री कृष्णगोपाल श्रेष्ठ र मुख्यमन्त्री लालबावु राउतबीच आज मुख्यमन्त्री तथा मन्त्रिपरिषद्को कार्यालयमा विकास निर्माणका विषयमा छलफल भएको छ । शहरी विकास मन्त्रालयका प्रदेश नं २ मा जारी विकास निर्माणका कार्यको स्थलगत निरीक्षण तथा अवलोकनमा रहनुभएका मन्त्री श्रेष्ठले मुख्यमन्त्री राउतसँग विकास निर्माणको कार्यमा तीनवटै तहका सरकारबीच समन्वय हुनुपर्नेमा जोड दिनुभयो ।
मुख्यमन्त्री तथा मन्त्रिपरिषद्को सचिवालयका अनुसार मुख्यमन्त्री लालबावु राउतले धार्मिक पर्यटकीय क्षेत्र जनकपुरधाममा पर्यटक आकर्षित गर्न सङ्घीय सरकारले ठोस पहल गर्नुपर्ने बताउनुभएको थियो । उहाँले जनकपुरधाममा ल्याण्डफिल साइट निर्माणका लागि मन्त्री श्रेष्ठसँग आग्रह गर्नुभएको थियो । सो अवसरमा शहरी विकासमन्त्री श्रेष्ठले प्रदेश सरकारले नीति तथा कार्यक्रममा समेटेको सप्तरीदेखि पर्सासम्मको धार्मिक पर्यटकीय करिडोर निर्माणमा सहयोग गर्ने जानकारी गराउनुभयो । उहाँले आफ्नो मन्त्रालयबाट प्रदेशमा हुने सम्पूर्ण विकास निर्माणको कार्यमा प्रदेश सरकारसँग समन्वय गर्ने प्रतिवद्धता व्यक्त गर्नुभयो ।(रासस)
आफ्नो प्रतिकृया दिनुहोस्