अब त आश मरि सक्यो : दुर्गा देवी पन्त

२७ जेठ,कन्चनपुर : छोरी निर्मला पन्तका हत्यारा अहिले सम्म पत्ता लागेको छैन् । पत्ता लगाएको भए त धेरै कुरा थाहा हुन्थ्यो होला । तर खोइ केही थाहा छैन् । अब अनुसन्धान गर्छन् या गर्दैैनन् त्यो पनि थाहा छैन् । हिजो आज त यता आएर कसैले पनि सोधपुछ गरेका छैनन् । मलाई अब आशै मरि सक्यो । अहिले सम्म कसैले पत्ता लगाएनन् र लगाउँछन् जस्तो पनि लाग्दैन् । पहिले अर्थात एक दुई वर्ष अगाडि त प्रहरीहरु आउँदै खोजी गर्दैछौं भन्थे । अहिले चाँही आएका नि छैन्न् । पत्ता लगाउँदैनन् जस्तो लाग्छ । आशा मरि सक्यो ।

कानुन पनि यस्तै रहेछ । गर्छु भन्दा भन्दै धेरै वर्ष विति सक्यो । हिजो आज त अपराधी पत्ता लगाउन खोजी गरेको जस्तो नै लाग्दैन् । त्यसैले धेरै आशा गर्ने ठाउँ छैन् । धेरै तिरको दबाब पछि तत्काल सरकारले केही राहत दिएको थियो । पहिले नै सरकारले राहत दिएको हो । त्यही मात्रै हो, अहिले पाएको छैन् ।

अहिले स्वास्थ्य कार्यालय सहयोगीका रुपमा काम गरिरहेको छु । दिन काट्ने बाटो गरिरहेको छु । आफ्नो जीवन चलाउनलाई अरु केही काम छैन् । के गर्नु सानो तिनो काम गर्नै पर्यो । घट्ना भयो, माहोल बिग्रियो । एकदमै समस्या भयो । अनि सानो जागिर लगाइ दिनु भनेका थियौं । त्यस पछि २०७६ साल देखि काम गरिरहेको छु ।

अझैपनि अपराधी पत्ता लगाइ दिनुहोस् भनिरहेकी छु ।तपाईहरुले अनुसन्धानकर्ताहरु लाई पनि सोधि दिनु होला र कारबाही गराइ दिनु होला । घटना भइहाल्यो छोरी त फर्केर आउँदिनन् तर पनि अपराधीलाई सजाय मिल्यो भने अलि सन्तुष्टि हुने थियो । (निर्मला पन्तकी आमा दुर्गा देवी सँग कुराकानीमा आधारित)

निर्मला प्रकरण बारे सुक्ष्म अनुसन्धान जारी छ : एसपी खत्री
कन्चनपुरकी निर्मला पन्तको वलात्कार पछि भएको हत्याबारे सुक्ष्म अनुसन्धान जारी रहेको जिल्ला प्रहरी कार्यालय कन्चनपुरले जनाएको छ ।जिल्ला प्रहरी कार्यालय कन्चनपुरका प्रहरी उपरीक्षक(एसपी) खड्क बहादुर खत्रीले उक्त घटनाका सम्बन्धमा सुक्ष्म अनुसन्धान जारी राखेको प्रतिक्रिया दिएका हुन् ।

‘निर्मला पन्तको घटना पूरानो हो । यद्यपी, नेपाल प्रहरीको केन्द्रीय अनुसन्धान व्यूरो र जिल्ला प्रहरी कार्यालय कञ्चनपुर टीमले मिले सम्म सुक्ष्म रुपमा अनुसन्धान गरि राखेकै छ,’ उनले भने ।जटिल केसहरुको अध्ययन रोक्न नमिल्ने भएकाले अध्ययन र अनुसन्धान जारी रहेको एसपी खत्रीको भनाइ छ ।

‘यो लामो हद म्याद भएको मुद्दा पनि हो र यस्तो जटिल केसहरुलाई अनुसन्धान बीचमा नै रोक्ने कुरै भएन । त्यसैले पनि अनुसन्धान सुक्ष्म रुपमा भइरहेको छ ।’ घटनाको लगत्तै केन्द्रीय अनुसन्धान ब्यूरो, (सिआइबी) लगायतका स्थानबाट प्रहरी अधिकारी पुगेर घटनाको अनुसन्धान गरेको थियो ।

तत्कालिन अवस्थामा दिलिप सिंह विष्टको डीएनए नमिले पछि घटनाको अनुसन्धान पेचिलो बनेको थियो ।निर्मलाको बलात्कार र हत्या प्रकरणमा झन्डै एक सय जनाको डीएनए परीक्षण गरिएपनि डीएनए म्याचिङ भएको थिएन् । त्यस पछिको अनुसन्धानले कुनै निष्कर्ष दिन सकेको छैन् ।