६ असार, सिरहा, (गोलबजार)। प्रेम सम्बन्धमा रहेका युवक र युवती बीचको विवाद हिंसात्मक बन्दै गए पछि सिरहाको गोलबजारमा एक युवतीले आफ्नै प्रेमी माथि छुरा प्रहार गरेकी छन्।
छुरा प्रहारबाट घाइते भएका युवक २४ वर्षीय अशोक कुमार महतो हुन्, जो गोलबजार नगरपालिका–१३ का स्थायी बासिन्दा हुन् र हाल गोलबजार–४ मा भाडाको कोठामा बस्दै आएका थिए। घटना सोही ठाउँस्थित दिनेश साहको घरमा भएको जनाइएको छ।
प्रहरीका अनुसार युवती अचानक कोठामा पुगेकी थिइन् र अशोक माथि छुरा प्रहार गरे पछि भाग्न खोज्दै घरको छतबाट हाम फालेकी थिइन्। हाम फाल्दा उनी पनि घाइते भएकी छन्। अशोकको उपचार गोलबजार स्थित भूमिजा अस्पतालमा भइरहेको छ भने युवतीको पनि सामान्य उपचार गरिएको छ।
स्थानीयवासीका अनुसार उनीहरू बीच लामो समय देखि प्रेम सम्बन्ध थियो, तर पछिल्लो समय सम्बन्धमा खटपट देखिन थालेको थियो।
प्रहरीले युवतीलाई नियन्त्रणमा लिएको छ र थप अनुसन्धानका लागि जिल्ला प्रहरी कार्यालय, सिरहा पठाइएको जनाएको छ। घटना किन र कसरी भएको भन्ने बारे अनुसन्धान जारी रहेको प्रहरीले जनाएको छ।
आफ्नो प्रतिकृया दिनुहोस्