८ असार,काठमाडौं । झुटो रोजगारीको आश्वासनमा भारत पुर्याइएर बन्धक बनाइएका ३५ जना नेपाली युवाको उद्धार गरिएको छ। उनीहरूलाई भारतको उत्तराखण्ड स्थित काशिपुरबाट सकुशल उद्धार गरी चाँडै नेपाल फर्काउने तयारी भइरहेको छ।
गत बिहीबार नेपाली दूतावास, भारतीय प्रहरी र ‘केन इन्डिया’ नामक सामाजिक संस्थाको सहकार्यमा उनीहरूलाई उद्धार गरिएको हो। संस्थाका निर्देशक नवीन जोशीका अनुसार, आवश्यक अदालती र प्रशासनिक प्रक्रिया पूरा भए पछि उनीहरूलाई मंगलबार सम्म नेपाल ल्याइने छ।
जोशीले जानकारी दिए अनुसार उद्धार कार्यमा एक महिनाको लगातार प्रयास पछि सफलता प्राप्त भएको हो। सो क्रममा नेपाली एक जना र दुई भारतीय मानव तस्करलाई पक्राउ गरिएको छ भने थप अनुसन्धान भइरहेको छ।
उद्धार गरिएकामध्ये इलामको माईमाई–८ का सौगात काफ्लेले आफूलाई झुक्याएर भारत पुर्याइएको बताउँछन्। उनका अनुसार एक व्यक्तिले आफ्नो ‘अंकल’ को नक्कली परिचय प्रयोग गरी भारत लगेको थियो।
“मलाई मासिक ३८ हजार तलब दिने भनेको थियो,” उनले भने, “तर भारत पुगेपछि ठगियो। सुरुमा मटन–चिकन दिने भने पनि पछि आलु र बेसार पानी मात्र खुवाइयो। चार लाख ऋण लाग्यो। कोठामा थुनेर यातना दिइयो।”
परराष्ट्र मन्त्रालयको निर्देशनमा नेपाली दूतावास, उत्तराखण्ड प्रहरी र स्थानीय संस्था केन इन्डियाको सहयोगमा असार ५ गते उद्धार कार्य सम्पन्न गरिएको हो।
मानव तस्करको गिरोहले पीडितहरू सँग ४० हजार देखि ७० हजार रुपैयाँ सम्म असुली गरेको पाइएको छ। निर्देशक जोशीका अनुसार यस्ता गिरोहहरू महिनामा करिब ५० जना नेपालीलाई भारतका विभिन्न भागमा पुर्याउने गर्छन्।
जोशी विगत १५ वर्ष देखि भारतको दिल्लीमा रही मानव बेचबिखन विरुद्ध काम गर्दै आएका सामाजिक अभियन्ता हुन्। उनको संस्थाले नेपालबाट भारत हुँदै तेस्रो मुलुक तर्फ लागेका क्रममा ठगिएका वा बेचिएका व्यक्तिहरूको उद्धार गर्दै आएको छ।
आफ्नो प्रतिकृया दिनुहोस्