१६ असार। सिरहा सदरमुकामस्थित प्रादेशिक अस्पतालमा उपचारको क्रममा १२ वर्षीय बालकको मृत्यु भए पछि अस्पताल परिसर तनावग्रस्त बनेको छ। मृतक बालक सिरहा नगरपालिका–६, बसबिट्टाका झल्कु महराका छोरा राजन महरा रहेको जिल्ला प्रहरी कार्यालय सिरहाले जनाएको छ।
राजनलाई सोमबार बिहान असहज महसुस भए पछि अस्पतालमा भर्ना गरिएको थियो। तर उपचारकै क्रममा उनको ज्यान गएको हो। बालकको मृत्यु पछि आक्रोशित परिवारजन र स्थानीयबासीले अस्पताल प्रशासनको लापरवाहीको आरोप लगाउँदै गेट अगाडि टायर बालेर प्रदर्शन गरे।
वडा नम्बर ६ का अध्यक्ष इन्द्रजित यादवले अस्पतालमा सेवा प्रवाहमा लापरबाही हुँदै आएको आरोप लगाए। उनले भने, “हामीले पटक–पटक सेवा सुधारको माग गरेका थियौं, तर बेवास्ता भयो। अहिलेको घटनाले त्यो लापरवाहीको प्रमाण दिएको छ।”
यसै बीच, प्रादेशिक अस्पतालका सूचना अधिकारी राम नारायण चौधरीले बालकलाई गम्भीर रक्तअल्पता (सिभियर एनिमिया) भएको जानकारी दिए। उनका अनुसार, राजनको हेमोग्लोबिन मात्रा केवल २.५ ग्राम/डिएल मात्र थियो, जुन जीवनका लागि अत्यन्तै जोखिमपूर्ण मानिन्छ।
“बी–पोजेटिभ रगतको आवश्यकता थियो,” चौधरीले भने, “रगत उपलब्ध भए पनि ट्रान्सफ्युजनको तयारी भइरहेकै बेला उनको निधन भयो।”
अस्पतालका आकस्मिक सेवा प्रमुख डा. नितेश कर्णले समेत बिरामीलाई आवश्यक उपचार तुरुन्तै शुरू गरिएको भए पनि अवस्था अत्यधिक जटिल भएकोले बचाउन नसकिएको बताए।
स्थानीय प्रशासन र अस्पताल पक्षबीच समन्वय गरी तनाव नियन्त्रणमा ल्याउने प्रयास भइरहेको जनाइएको छ।
आफ्नो प्रतिकृया दिनुहोस्