जनकपुर। धनुषा जिल्लामा ऋण दिने साहु–महाजनहरू नै अन्यायको सामना गर्नु परेको भन्दै नागरिक समाजले शुक्रबार प्रदर्शन गर्दै प्रमुख जिल्ला अधिकारी मार्फत प्रधानमन्त्री र गृहमन्त्रालयलाई ध्यानाकर्षण-पत्र बुझाएका छन्।
मिथिलाबिहारी नगरपालिका–१०, ठेराका नागरिक अगुवाहरूले सरकारको ‘मिटर ब्याज’ सम्बन्धी कानुन लागू भए पनि ग्रामीण क्षेत्रमा आपतकालीन अवस्थामा साहुहरूबाट ऋण लिने प्रथा अझै कायम रहेको बताए। तर, कानुनी प्रक्रिया पुरा गरेर ऋण दिने साहुहरूलाई ऋण असुलीमा अवरोध र अनावश्यक दबाब दिइँदै आएको गुनासो गरिएको छ।
प्रमुख जिल्ला अधिकारीलाई बुझाइएको ध्यानाकर्षण-पत्रमा अदालतको आदेश कार्यान्वयनमा प्रहरी प्रशासनले लापरबाही गरिरहेको आरोप लगाइएको छ। ठेराका स्थानीय एवं नागरिक समाजका प्रमोद कुमार यादवले उच्च अदालत जनकपुरले स्पष्ट आदेश दिएर पनि प्रहरीबाट फोन मार्फत विभिन्न प्रकारको दबाब आइरहेको बताए।
उनका अनुसार केही व्यक्तिहरूले विभिन्न समितिको नाममा गाउँमा गलत हल्ला फैलाएर साहुहरूलाई आतंकित बनाउने प्रयास गरिरहेका छन्। यस विषयमा सरकारले दोषीलाई कारबाही गरी अदालतको फैसला कार्यान्वयनमा सहजता ल्याउनु पर्ने माग गरिएको छ।
आफ्नो प्रतिकृया दिनुहोस्