मटिहानी (महोत्तरी) । दीपावली र छठ पर्व नजिकिँदै गर्दा भारतको बिहारस्थित मधवापुर बजारमा नेपाली ग्राहकको भीड दिन प्रतिदिन बढ्दै गएको छ, जबकि सिमावर्ती मटिहानी बजार भने सुनसान बनेको छ ।
पर्व–चाडका लागि आवश्यक सामग्री किन्न सीमापार जाने नेपालीको भीडले भारतीय बजार रौनकिलो बनेको हो । दैनिक उपभोग्य वस्तु, लत्ताकपडा, भाँडावर्तन देखि चिनी, मैदा, तेलजस्ता सामग्री भारतमा सस्तो पाइने भएकाले नेपाली उपभोक्ता त्यहीँबाट किनमेल गर्न आकर्षित भएका छन् ।
मटिहानीका स्थानीय निवासी चन्दे मण्डलका अनुसार, “यो समयमा नेपाल–भारत सिमामा सवारीको लामो जाम लाग्ने गर्छ । नेपालका बजार सुनसान रहन्छन्, तर भारतीय बजारमा भिडभाड हुन्छ,” उनले बताए । उनका अनुसार भारतीय बजारमा धेरै सामान नेपाल भन्दा करिब आधा मूल्यमै पाइने हुँदा उपभोक्ता उतै आकर्षित हुने गरेका छन् ।
उनले थपे, “चाडपर्वमा आवश्यक हुने चिनी, मैदा, तेल लगायतका सामग्री भारतमा १० देखि ३० रुपैयाँ सम्म सस्तो पर्छ ।” सिमावर्ती बासिन्दाहरू दैनिक खाद्यान्न, कपडा, भाँडावर्तन देखि विवाह, श्राद्ध, भोजभतेर र पर्वका तयारीका लागि पनि भारतीय बजारमै निर्भर रहेका छन् । यसले गर्दा दैनिक रूपमा नेपाली रुपैयाँ भारत तर्फ बग्ने क्रम बढ्दो छ ।
जनकपुर उद्योग वाणिज्य संघका अनुसार, भारतीय बजारको बढ्दो प्रभावले स्थानीय नेपाली व्यापारीहरू मर्कामा परेका छन् । संघका पदाधिकारीहरूले स्वदेशी व्यापार प्रवर्धन नहुँदा वर्षेनी करोडौँ नेपाली रुपैयाँ विदेशी बजारमा जाने गरेको बताउँदै यस प्रति सरकार र सम्बन्धित निकाय गम्भीर बन्नु पर्ने बताएका छन् ।
यता, सीमाक्षेत्रका विभिन्न नाकाबाट राजस्व छलि गरी भारतीय सामान तस्करी मार्फत नेपाल भित्रिने गरेको स्थानीयहरू बताउँछन् । यसले स्वदेशमै उत्पादन भएका सामानको बिक्री घटाएको र नेपाली उद्योग–व्यवसाय माथि प्रत्यक्ष असर परेको उनीहरूको गुनासो छ ।
स्थानिय व्यापारीहरूको भनाइमा, “यदि सीमामा निगरानी कडाइ गरिए र स्वदेशी उत्पादनलाई प्रोत्साहन दिइयो भने नेपाली बजारमा फेरि रौनक फर्किन सक्छ ।”
आफ्नो प्रतिकृया दिनुहोस्