१९ माघ,रौतहट । फागुन २१ गते हुने निर्वाचनको मिति नजिकिए सँगै रौतहट क्षेत्र नं. ४ मा चुनावी सरगर्मी ह्वात्तै बढेको छ। उम्मेदवारहरू आ–आफ्नो एजेन्डासहित मतदाताको घरदैलोमा पुगे पछि यतिबेला बस्ती-बस्तीमा चुनावी बहस र रौनकता छाएको हो। यसपटक यो क्षेत्रमा ३७ जनाको उम्मेदवारी परेको छ, जसमा ३० पुरुष र ७ महिला चुनावी मैदानमा रहेका छन्। निर्वाचनमा ३० जना नयाँ अनुहार र २० जना स्वतन्त्र उम्मेदवारहरूको उपस्थितिले ठुला दलहरूलाई ठूलो दबाब सिर्जना गरेको छ।
मुख्य प्रतिस्पर्धाको रूपमा नेपाली कांग्रेसका देव प्रसाद तिमल्सिना, नेकपा एमालेका रामजी साह र नेपाली कम्युनिस्ट पार्टीका रामकुमार भट्टराईलाई हेरिएको छ। त्यस्तै, राष्ट्रिय स्वतन्त्र पार्टीका गणेश पौडेल र आम जनता पार्टीका ऋषि धमाला पनि सशक्त रूपमा घरदैलो अभियानमा व्यस्त छन्। जनता समाजवादी पार्टी, जनमत पार्टी र उज्यालो नेपालका उम्मेदवारहरूले पनि आफ्नो उपस्थिति बलियो बनाउँदै मतदाताको मन जित्ने प्रयास गरिरहेका छन्।
उम्मेदवारहरूले विकास र समृद्धिलाई नै आफ्नो मुख्य चुनावी नारा बनाएका छन्। उनीहरूले सडक सञ्जालको विस्तार, खानेपानीको सुनिश्चितता, सुकुम्बासी समस्याको स्थायी समाधान, र कृषिको आधुनिकीकरण गर्ने प्रतिबद्धता मतदातासामु राखेका छन्। साथै, गुणस्तरीय स्वास्थ्य सेवा, शिक्षामा सुधार, भ्रष्टाचार मुक्त प्रशासन र पारदर्शी विकासका एजेन्डाहरू पनि व्यापक रूपमा उठाइएका छन्।
यतिबेला रौतहटका चोक र गाउँहरू दलीय झण्डा र चुनाव चिह्नले रंगिएका छन्। मतदाताहरू माझ पुरानै अनुहारलाई दोहोर्याउने कि नयाँ शक्तिलाई अवसर दिने भन्ने विषयमा व्यापक चर्चा चलिरहेको छ। ३७ जना उम्मेदवार मध्ये कसले बाजी मार्ने हो भन्ने कुराको अन्तिम फैसला भने फागुन २१ गतेको मतदानले नै गर्नेछ।
आफ्नो प्रतिकृया दिनुहोस्