२४ माघ ,काठमाडौं । नेपाल आदिवासी जनजाति पत्रकार महासंघ (फोनिज) काठमाडौं शाखाको २२औं वार्षिक साधारण सभा शनिबार काठमाडौंमा सम्पन्न भएको छ।
साधारण सभामा फोनिजका संघीय अध्यक्ष लक्की चौधरीले आदिवासी जनजाति पत्रकारहरूको माग र मुद्दा प्रति सरकार अझै गम्भीर नभएको गुनासो गरे। उनले मातृभाषी पत्रकारप्रति सरकारको दृष्टिकोण अझै विभेदकारी रहेको भन्दै फोनिजलाई सरकारले अहिलेसम्म “टोकन मनी” जस्तो सीमित सहयोग मात्र गरेको बताए।
“पत्रकारहरूको पेशागत सुरक्षा, हक–हित र संरक्षण त अझै धेरै टाढाको कुरा हो,” अध्यक्ष चौधरीले भने।उनले मातृभाषामा लेख्ने तथा लेख्न चाहने पत्रकारहरूलाई प्रोत्साहन गर्न फोनिज काठमाडौं शाखाले अग्रसर भूमिका खेल्नु पर्नेमा जोड दिए। साथै देशभरका आदिवासी जनजाति पत्रकारहरूलाई काठमाडौंमा सक्रिय बनाउँदै शाखालाई चलायमान बनाउनु पर्ने आवश्यकता औंल्याए। “हामी काठमाडौं शाखा सबैभन्दा सक्रिय शाखाका रूपमा संगठित भएको हेर्न चाहन्छौं, तर अहिले उपस्थिति निकै पातलो देखियो। यसलाई बढाउन जरुरी छ,” उनले भने।
चौधरीले नेपाल पत्रकारिताको इतिहासमा वि.सं. २००८ सालमा सत्य नारायण बहादुर श्रेष्ठले पत्रकार संघ स्थापना गरे पनि नेपाल पत्रकार महासंघबाट मान्यता नपाउनु दु:खद रहेको बताए। “जसले पत्रकारिता र महासंघको जन्म दिए, उसैलाई अहिले पहिचान मेटाएर साइड लगाउने काम भइरहेको छ,” उनले भने, “यसलाई फोनिजले आन्दोलनको एजेन्डा बनाउँदै सत्य र न्यायको पक्षमा वकालत गर्नुपर्छ।”
उनले आदिवासी पत्रकारहरूको संगठनमा एकता र पहिचान बलियो बनाउन तथा आदिवासी मुद्दामा खोजी पत्रकारिता बढाउनु पर्ने आवश्यकता पनि औंल्याए।कार्यक्रममा फोनिज काठमाडौंकी कोषाध्यक्षले आर्थिक प्रतिवेदन प्रस्तुत गरे भने सचिव रत्नकाजी महर्जनले संगठनात्मक प्रतिवेदन पेश गरे।
अध्यक्ष भीम लामाले संघीय संरचनाका कारण विधानले दिएको अधिकार कार्यान्वयनमा अवरोध आएको भन्दै केन्द्रसँग पहल गर्न आग्रह गरे। “हामीले काम गर्न खोज्दा पनि विधान र केन्द्रको दबाबका कारण गर्न सकेका छैनौं। तत्काल पहल गरिदिन अनुरोध गर्दछु,” उनले भने।कार्यक्रममा अन्य वक्ताहरूले शुभकामना मन्तव्य दिएका थिए।
आफ्नो प्रतिकृया दिनुहोस्