११ फागुन,महोत्तरी : मिथिलाञ्चलको धार्मिक, सांस्कृतिक तथा आपसी सद्भावको महाकुम्भ मानिने १५ दिने मिथिला मध्यमिकी परिक्रमा आज सातौँ दिन महोत्तरीको कञ्चनवन पुगेको छ। त्रेतायुगमा भगवान् राम र माता जानकीले विवाह पश्चात् मिथिलाका विभिन्न क्षेत्रमा विहार गर्ने क्रममा कञ्चनवन पुगेर रङ खेलेको जनविश्वास रहेको छ।
सोही पौराणिक घटनाको स्मरणमा आज कञ्चनवनमा विशेष ‘होरी उत्सव’ मनाइएको छ, जहाँ परिक्रमा यात्री, साधुसन्त र स्थानीयवासीले एक-आपसमा अबिर दलेर खुसीयाली साटासाट गरेका छन्। मिथिलाञ्चलमा आजकै दिन देखि औपचारिक रूपमा होली पर्व सुरु भएको मानिन्छ।धनुषाको कचुरीबाट शुरु भएको यो ऐतिहासिक यात्रा हिजो ध्रुवकुण्डमा विश्राम गरी आज कञ्चनवन आइपुगेको हो।
नेपाल र भारतको धार्मिक एवं पारम्परिक सम्बन्धको प्रतीक मानिने यस परिक्रमाका कुल १५ विश्राम स्थलहरू मध्ये १३ वटा नेपालको धनुषा र महोत्तरीमा पर्दछन् भने २ वटा भारतमा पर्दछन्। परिक्रमाको बाँकी तालिका अनुसार, टोली भोलि मंगलबार धनुषाको पर्वत, बुधबार धनुषाधाम, बिहीबार सतोषर र शुक्रबार औरहीमा एक-एक रात विश्राम गर्नेछ।
परिक्रमाको अन्तिम चरणमा यात्रीहरू पूर्णिमाको अघिल्लो रात जनकपुरधाम आइपुग्ने छन्। पूर्णिमाको बिहानीपख जनकपुरको अन्तगृह परिक्रमा गरी सामूहिक रूपमा होली खेलेपछि यो १५ दिने कठिन तर श्रद्धापूर्ण यात्रा सम्पन्न हुनेछ। परिक्रमा यात्रामा सहभागी भएमा मन, वचन र कर्मले गरेका पाप तथा अन्यायहरू नष्ट भई मनोकामना पूरा हुने गहिरो धार्मिक विश्वास रहिआएको छ। यसले गर्दा हरेक वर्ष हजारौँको संख्यामा श्रद्धालुहरू नाङ्गो खुट्टा यो पदयात्रामा सहभागी हुने गर्दछन्।
आफ्नो प्रतिकृया दिनुहोस्