१४ फागुन,ढाका : बंगलादेश सम्पादक परिषद्ले देशव्यापी रूपमा पत्रकारहरू विरुद्ध दर्ता गरिएका झुटा र प्रतिशोधपूर्ण मुद्दाहरू तत्काल फिर्ता लिन त्यहाँको सरकारसँग जोडदार माग गरेको छ। परिषद्का अध्यक्ष नुरुल कबीर र महासचिव देवान हानिफ महमुदद्वारा जारी गरिएको संयुक्त विज्ञप्तिमा, पत्रकारहरूलाई दुःख दिने र मानसिक तनाव दिने उद्देश्यले लगाइएका यस्ता मुद्दाहरूले प्रेस स्वतन्त्रतामा गम्भीर आँच पुर्याएको उल्लेख गरिएको छ।
विशेषगरी सन् २०२४ अगस्ट ५ को राजनीतिक परिवर्तनयता बंगलादेशका विभिन्न स्थानमा पत्रकारहरूलाई निशाना बनाउँदै थुप्रै झुटा हत्या मुद्दा र अन्य उत्पीडनात्मक मुद्दाहरू दर्ता गरिएका छन्। विज्ञप्तिमा उल्लेख भएअनुसार, यी मुद्दाका कारण व्यावसायिक पत्रकारहरू नियमित रूपमा अदालत धाउन बाध्य भएका छन्, जसले गर्दा उनीहरूको दैनिक पेशागत गतिविधिमा अवरोध उत्पन्न हुनुका साथै समग्र सञ्चार क्षेत्रमै त्रासको वातावरण सिर्जना भएको छ।
परिषद्ले स्पष्ट पारेको छ कि यदि कुनै पत्रकारविरुद्ध ठोस र प्रमाणित आरोप छन् भने प्रचलित कानुनअनुसार निष्पक्ष न्यायिक प्रक्रिया अपनाइनु पर्छ, तर राजनीतिक रूपमा प्रेरित र पूर्वाग्रही मुद्दाहरू कुनै पनि हालतमा स्वीकार्य हुन सक्दैनन्।यसअघि पनि परिषद्ले अन्तरिम सरकारलाई पत्रकारमाथिको उत्पीडन रोक्न र मुद्दा फिर्ता लिन पटक-पटक ध्यानाकर्षण गराउँदै आएको थियो।
सरकारले मुद्दाहरूको पुनरावलोकन गर्ने आश्वासन दिए तापनि हालसम्म यस दिशामा कुनै अर्थपूर्ण र ठोस प्रगति नभएकोमा सम्पादक परिषद्ले गम्भीर चिन्ता व्यक्त गरेको छ। लोकतान्त्रिक राज्यको मुख्य आधार नै सञ्चार स्वतन्त्रता र श्रमजीवी पत्रकारको सुरक्षा भएको स्मरण गराउँदै परिषद्ले नवनिर्वाचित सरकारलाई यस विषयलाई उच्च प्राथमिकतामा राख्न र तत्काल कानुनी उपचारमार्फत समस्या समाधान गर्न आग्रह गरेको छ।
आफ्नो प्रतिकृया दिनुहोस्