१८ चैत,मधेश प्रदेश : यस वर्षको माध्यमिक शिक्षा परीक्षा (एसइइ) भोलि बिहीबार देखि देशभर शुरु हुँदैछ। राष्ट्रिय परीक्षा बोर्डका अनुसार यसपटक ५ लाख १२ हजार ४२१ जना विद्यार्थी परीक्षामा सहभागी हुँदैछन्।
जस मध्ये प्राविधिक धारबाट १६ हजार ३१२ जना तथा पार्सियल तर्फ २६४ जनाले परीक्षा दिनेछन्। बिहान ८ बजे देखि देशका ७७ वटै जिल्लामा रहेका २ हजार ३६ परीक्षा केन्द्रबाट परीक्षा एकैसाथ सञ्चालन गरिने बोर्डले जनाएको छ।
यसैबीच, मधेश प्रदेशमा पनि एसइइ परीक्षाका लागि व्यापक तयारी पूरा भएको छ। प्रदेशभरका आठै जिल्लामा सुरक्षा व्यवस्था कडा पारिएको छ भने परीक्षा केन्द्रहरूमा आवश्यक जनशक्ति परिचालन गरिएको छ। शिक्षा विकास निर्देशनालय, मधेश प्रदेशका अनुसार हजारौं विद्यार्थी यस वर्ष एसइइमा सहभागी हुँदैछन्।
नकलरहित र मर्यादित वातावरणमा परीक्षा सञ्चालन गर्न स्थानीय प्रशासन, प्रहरी र शिक्षा निकायबीच समन्वय गरिएको जनाइएको छ। साथै, संवेदनशील केन्द्रहरूमा विशेष निगरानीको व्यवस्था गरिएको छ।
राष्ट्रिय परीक्षा बोर्डले सबै विद्यार्थीलाई आत्मविश्वासका साथ परीक्षा दिन आग्रह गर्दै अनुशासित र व्यवस्थित रूपमा परीक्षा सम्पन्न गराउने प्रतिबद्धता जनाएको छ।
आफ्नो प्रतिकृया दिनुहोस्