साइबर अपराध रोक्दै डिजिटल वित्तीय प्रणालीलाई सुरक्षित बनाउन एउटै भौतिक कक्षबाट २४ सै घण्टा सेवा प्रारम्भ
काठमाडौँ।नेपालमा दिनप्रतिदिन बढ्दै गएको साइबर अपराध र वित्तीय ठगीका घटनाहरूलाई प्रभावकारी रूपमा नियन्त्रण गर्दै देशको डिजिटल वित्तीय प्रणालीलाई सुरक्षित र विश्वसनीय बनाउने उद्देश्यका साथ ‘एकीकृत साइबर स्क्याम प्रतिकार्य केन्द्र’ (IACSC) सञ्चालनमा ल्याइएको छ। मिति २०८३ कार्तिक २० गते प्रहरी महानिरीक्षक डा. मनोज कुमार के.सी.को प्रमुख आतिथ्यमा आयोजित एक विशेष कार्यक्रमका बिच उक्त केन्द्रको उद्घाटन गरी सेवा सञ्चालनमा ल्याइएको हो।
नेपाल सरकार (मन्त्रीस्तर) को मिति २०८३ असोज २३ गतेको निर्णयबाट स्वीकृत “एकीकृत साइबर स्क्याम प्रतिकार्य केन्द्र (IACSC) स्थापना र कार्यसञ्चालन सम्बन्धी दिग्दर्शन, २०८३” बमोजिम यस केन्द्रको औपचारिक स्थापना गरिएको हो। प्रहरी महानिरीक्षक डा. के.सी.ले साइबर अपराधका बदलिँदा स्वरूपहरूसँग लड्न र आम नागरिकको वित्तीय सुरक्षा सुनिश्चित गर्न यो एकीकृत संयन्त्र अत्यन्त महत्वपूर्ण र दूरगामी कदम हुने विश्वास व्यक्त गर्नु भएको छ।
यस केन्द्रको मुख्य विशेषता भनेको विभिन्न निकायहरू बिचको द्रुत र एकीकृत सहकार्य हो। अब नियामक निकाय, नेपाल प्रहरी, बैंक तथा वित्तीय संस्था, डिजिटल वालेट सेवा प्रदायक, दूरसञ्चार कम्पनी र इन्टरनेट सेवा प्रदायक (ISP) संस्थाहरूले एउटै भौतिक कक्षबाट एकीकृत रूपमा कार्य सम्पादन गर्नेछन्। यसरी सबै सम्बन्धित संस्थाहरू एकै ठाउँमा बसेर कार्य गर्दा साइबर स्क्याम र ठगीका घटनाहरू हुनासाथ यथाशीघ्र प्रतिकार्य गरी सम्भावित जोखिम तथा क्षतिलाई तत्काल घटाउन सम्भव हुनेछ।
यसैबिच साइबर ठगी सम्बन्धी उजुरी, गुनासो तथा सूचनाहरू २४ सै घण्टा प्राप्त गर्नका लागि केन्द्रमा चौबीसै घण्टा खटिने गरी सम्पर्क अधिकृतहरू तोकिएको छ। सर्वसाधारणले ठगीमा परेको थाहा पाउना साथ तत्काल उजुरी गर्न सकून् भन्ने हेतुले १२४७ (1247) आकस्मिक फोन नम्बरको समेत व्यवस्था गरिएको छ, जसले डिजिटल अपराध नियन्त्रणमा तत्काल ‘एक्सन’ लिन ठूलो सहयोग पुर्याउने छ ।
आफ्नो प्रतिकृया दिनुहोस्