चितवन, ७ असार : भरतपुर महानगरपालिका–१ आँपटारीमा निर्माण गरिएको सार्वजनिक शौचालय र यात्रु प्रतीक्षालय सामुदायिक वनलाई हस्तान्तरण गरिएको छ । बागमती प्रदेश सरकार खानेपानी तथा सरसफाइ डिभिजन नम्बर १ मकवानपुरले निर्माण गरेको शौचालय र लायन्स क्लबले निर्माण गरेको कुरुवा घर एवं प्रतीक्षालय जलदेवी सामुदायिक वनलाई हस्तान्तरण गरिएको हो । महानगरपालिका प्रमुख रेनु दाहालले आज एक कार्यक्रममा भरतपुर महानगर सहरी क्षेत्रमा स्मार्ट शौचालय निर्माण गर्ने योजनामा रहेको बताउनुभयो ।
मुख्यतः नारायणी नदी किनार, वीरेन्द्र क्याम्पस गेट र चौबीसकोठीमा स्मार्ट शौचालय निर्माण गर्न लागिएको उहाँले जानकारी दिनुभयो । यात्रुहरूलाई समस्या नहुने गरी महानगरलाई स्वच्छ राख्न सवारीसाधनको चाप बढी हुने स्थानमा सार्वजनिक शौचालय निर्माण गर्न लागिएको दाहालले बताउनुभयो । शौचालय निर्माणसँगै सञ्चालनको प्रक्रिया चुनौतीपूर्ण हुने भन्दै उहाँले यसलाई दिगोरूपमा सञ्चालन गर्नु जरुरी रहेको बताउनुभयो ।
खानेपानी तथा सरसफाइ डिभिजन नं १ को रु ३२ लाख २० हजार दुई सय एकको लागतमा निर्माण गरिएको शौचालय र लायन्स क्लबको रु १० लाख ९० हजारको लागतमा निर्माण गरिएको प्रतीक्षालय एवं कुरुवाघर सामुदायिक वनका अध्यक्ष माधव देवकोटालाई हस्तान्तरण गरिएको हो । डिभिजन नं १ का प्रमुख इन्जिनियर सन्तोषकुमार श्रेष्ठले जिल्लाका तीन स्थानमा शौचालय निर्माणको काम गरेको बताउनुभयो । आँपटारी, देवघाट र मुग्लिनमा सार्वजनिक शौचालय निर्माणको काम गरिएको उहाँले जानकारी दिनुभयो ।
यात्रुलाई शौच गर्न सहज होस् भनी राजमार्गमा शौचालय निर्माणको काम गरिएको हो । आँपटारी र देवघाटको सञ्चालनमा आएको र मुग्लिनको सञ्चालन तयारीमा रहेको उहाँको भनाइ थियो । यस कार्यालयले जिल्लामा १३ वटा ठूला खानेपानी आयोजनाको काम गरिरहेको छ । हस्तान्तरण कार्यक्रममा भरतपुर महानगरपालिकाका उपप्रमुख चित्रसेन अधिकारीले यात्रुले सेवा लिने ठाउँ भएकाले यसको सरसफाइमा विशेष ध्यान दिन आग्रह गर्नुभयो । (रासस)
आफ्नो प्रतिकृया दिनुहोस्