२५ असार,धनुषा।जनकपुरधाममा आफ्नै ससुराको छुरा प्रहार गरी हत्या गरेको आरोपमा ज्वाइँ पक्राउ परेका छन्।
जनकपुरधाम उपमहानगरपालिका–१५, रामपुरका ७५ वर्षीय बासुदेव प्रसाद विमल (साह)को बुधबार बिहान आफ्नै घरमा छुरा प्रहार गरी हत्या गरिएको थियो। प्रहरीले घटनामा संलग्न रहेको आरोपमा मृतकका ज्वाइँ, वडा नं. २१ कुर्थाका ५५ वर्षीय बेचन महासेठलाई पक्राउ गरेको छ।
धनुषा जिल्ला प्रहरी कार्यालयका अनुसार पारिवारिक विवादका कारण महासेठले विमलको पेट र शरीरका अन्य भागमा ४–५ पटक छुरा प्रहार गरेका थिए। घटनापछि फरार रहेका महासेठलाई मंगलबार जनकनन्दनी गाउँपालिका–४ स्थित खजुरी रेल्वे स्टेशनबाट पक्राउ गरिएको हो। घटनामा प्रयोग भएको छुरा समेत प्रहरीले बरामद गरेको जनाएको छ।
प्रहरीले बुधबार पत्रकार सम्मेलनमार्फत अभियुक्त महासेठलाई सार्वजनिक गरेको हो। मृतक विमल जनकपुरधाम उपमहानगरपालिकाका मेयर मनोज कुमार साहका काका हुन्।
घटनाको विषयमा थप अनुसन्धान जारी रहेको जिल्ला प्रहरी कार्यालय धनुषाले जनाएको छ। स्थानीयवासी र सुरक्षाकर्मीहरू घटनास्थलमा तत्कालै पुगेका थिए भने प्रारम्भिक अनुसन्धानमा यो घरायसी विवादका कारण घटेको देखिएको प्रहरीले जनाएको छ।
आफ्नो प्रतिकृया दिनुहोस्