९ साउन,पर्सा। खानेपानी मन्त्री प्रदीप यादवले मधेश प्रदेशका आठ जिल्लामा बढ्दो खानेपानी संकट समाधान गर्न सबै क्षेत्रको हातेमालो र साझा जिम्मेवारी आवश्यक रहेको बताएका छन्।
शुक्रवार पर्साको ठोरी गाउँपालिका–४ मा निर्माण सम्पन्न ‘निर्मल बस्ती खानेपानी आयोजना’ को उद्घाटन समारोहलाई सम्बोधन गर्दै उनले भने, “ तराई–मधेश अहिले इतिहासकै गम्भीर जलसंकटको सामना गर्दैछ। यो अब सहानुभूतिले होइन, साझा प्रयासले समाधान गर्नुपर्ने समस्या हो।”
मन्त्री यादवले सरकार र मन्त्रालय नागरिकको मौलिक अधिकार स्वरूप स्वच्छ र सुरक्षित खानेपानी सुनिश्चित गर्न अहोरात्र खटिरहेको बताए। “विपद्को यो घडीमा हामी नागरिकलाई सुरक्षित पानी उपलब्ध गराउन प्रतिबद्ध छौं। समस्या चाँडै समाधान हुनेछ भन्ने विश्वास म आम जनतामा दिन चाहन्छु,” उनले भने।
उनका अनुसार, खानेपानी मन्त्रालयको विशेष पहलमा नेपाल सरकारको मन्त्रिपरिषद बाट मधेशका आठ जिल्ला लाई तीन महिनाका लागि विपद् संकटग्रस्त क्षेत्र घोषणा गरिएको छ।
“अब समाधानका लागि सबै पक्षको समन्वय अपरिहार्य छ,” मन्त्री यादवले भने, “दातृ निकाय, संघसंस्था र नागरिक समाज सबैको सहयोग आवश्यक छ। हामीले अहिले एक भएर काम गर्नु पर्छ।” उनले उद्घाटन गरिएको ‘निर्मल बस्ती खानेपानी आयोजना’ लाई ठोरी क्षेत्रको दीर्घकालीन समस्या समाधानतर्फको दिगो र रणनीतिक प्रयासको उदाहरण भने।
खानेपानी तथा ढल व्यवस्थापन विभागका महानिर्देशक इञ्जिनियर रामकुमार श्रेष्ठका अनुसार उक्त आयोजना अन्तर्गत ओभरहेड ट्याङ्की, डीप ट्युबवेल, कार्यालय भवन, पम्प हाउस र ट्रीटमेन्ट प्लान्ट निर्माण गरिएको छ। यसबाट ठोरी क्षेत्रका झन्डै २,१६५ बासिन्दाले प्रत्यक्ष लाभ लिने अपेक्षा गरिएको छ।
कार्यक्रममा ठोरी गाउँपालिका अध्यक्ष लालबहादुर श्रेष्ठ, उपाध्यक्ष गोकुली कुमारी रेग्मी, जिल्ला भूमि सम्बन्धी आयोगका अध्यक्ष तवेरेज अहमद, आयोजना प्रमुख विपुल कुमार लाल दास, निर्माण व्यवसायी लगायतको उपस्थिति थियो।
आफ्नो प्रतिकृया दिनुहोस्