६ फागुन,जनकपुर । १५ दिने मिथिला माध्यमिकी परिक्रमा आज भारतको गिरिजास्थान पुगेको छ । जनकपुरधामको हनुमाननगरबाट डोला सहित सुरु भएको परिक्रमा यात्रुहरू कल्याणेश्वरमा विश्राम गरी आज बिहानै गिरिजास्थान तर्फ प्रस्थान गरेका थिए । परिक्रमा टोली गिरिजास्थान पुगेर रात्रि विश्राम गर्ने कार्यक्रम रहेको छ ।
परिक्रमा यात्रुहरू भोलि मटिहानी पुग्नेछन् । त्यसपछि पाँचौँ दिन जलेश्वर, छैटौँ दिन मडई, सातौँ दिन ध्रुव कुण्ड, आठौँ दिन कञ्चनवन, नवौँ दिन पर्वता, दशौँ दिन धनुषाधाम, एघारौँ दिन सत्तोषर, बाह्रौँ दिन औरही, तेह्रौँ दिन करुणा, चौधौँ दिन विसौल हुँदै पन्ध्रौँ दिन जनकपुरधाम फर्किने कार्यक्रम रहेको छ ।
अन्तिम दिन जनकपुरधाम आइपुगेपछि पाँच कोशे अन्तर्गृह परिक्रमा गरी मिथिला माध्यमिकी परिक्रमा सम्पन्न गरिनेछ ।मिथिलाको महाकुम्भ भनेर चिनिने माध्यमिकी परिक्रमा नेपाल र भारतका १५ स्थानमा रात्रि विश्राम गर्दै करिब १३३ किलोमिटर दूरी पैदल यात्रा गर्ने धार्मिक परम्परा हो । यस परिक्रमामा नेपाल तथा भारतका विभिन्न स्थानबाट लाखौँ श्रद्धालु भक्तजन, साधुसन्त र नागा बाबाहरूको सहभागिता रहने गर्दछ ।
आफ्नो प्रतिकृया दिनुहोस्