२३ असोज,असोज कृष्ण चतुर्दशी,काठमाडौं । नेपालको नागरिक उड्डयन क्षेत्रलाई सुरक्षित, व्यवस्थित, भरपर्दो र सर्वसुलभ बनाउने उद्देश्यले दुई महत्वपूर्ण विधेयक प्रतिनिधि सभामा दर्ता भएका छन्। नेपाल हवाई सेवा प्राधिकरण विधेयक, २०८३ र नेपाल नागरिक उड्डयन प्राधिकरण विधेयक, २०८३ मार्फत नागरिक उड्डयन क्षेत्रको संस्थागत संरचनामा सुधार गर्ने प्रस्ताव गरिएको छ।
प्रस्तावित विधेयकले हवाई सेवा सञ्चालन गर्ने निकाय र त्यसको नियमन तथा सुरक्षा सुपरीवेक्षण गर्ने निकायलाई अलग-अलग बनाउने व्यवस्था अघि सारेका छन्। सेवा प्रदायक र नियामकको जिम्मेवारी छुट्याउँदा सम्भावित स्वार्थको द्वन्द्व न्यूनीकरण हुनुका साथै नियमन प्रणालीलाई थप प्रभावकारी बनाउन सहयोग पुग्ने अपेक्षा गरिएको छ।
प्रस्तावित व्यवस्था अनुसार नेपाल हवाई सेवा प्राधिकरणले विमानस्थलको पूर्वाधार निर्माण तथा सञ्चालन, एयर नेभिगेशन, प्राविधिक सेवा, उडान सुरक्षा र जोखिम व्यवस्थापन लगायतका जिम्मेवारी सम्हाल्ने छ। त्यस्तै, नेपाल नागरिक उड्डयन प्राधिकरणले इजाजतपत्र तथा प्रमाणपत्र जारी गर्ने, मापदण्ड निर्धारण गर्ने, नियमन गर्ने, सुरक्षा सुपरीवेक्षण गर्ने र अन्तर्राष्ट्रिय दायित्व सम्बन्धी कार्य गर्ने भूमिका निर्वाह गर्नेछ।
यी विधेयक मार्फत नागरिक उड्डयन क्षेत्रको जिम्मेवारी स्पष्ट पार्दै संस्थागत कार्यसम्पादन र सुरक्षा व्यवस्थालाई थप सुदृढ बनाउने लक्ष्य राखिएको छ। प्रस्तावित कानुनी व्यवस्था कार्यान्वयनमा आएमा नेपालको नागरिक उड्डयन प्रणालीलाई अन्तर्राष्ट्रिय मापदण्ड अनुरूप विकास गर्न तथा हवाई सेवालाई थप सुरक्षित र प्रभावकारी बनाउन सहयोग पुग्ने अपेक्षा गरिएको छ।
आफ्नो प्रतिकृया दिनुहोस्