हजारौं श्रद्धालु भक्तजनको सहभागिता, धार्मिक उत्साहले शहर रमायो
१३ असार,जनकपुरधाम। जनकपुरधाममा शुक्रबार ऐतिहासिक जगन्नाथ रथ यात्रा भव्य रूपमा सम्पन्न भएको छ। जानकी मन्दिरको प्रांगणबाट सुरु भएको रथ यात्रा जनकपुरधामका प्रमुख चोक र मार्गहरूको परिक्रमा गर्दै पुनः मन्दिर परिसरमै पुगेर समापन भएको हो।
जगन्नाथ, बलराम र सुभद्राको मूर्तिहरू राखिएको आकर्षक रथमा भगवानलाई नगर परिक्रमा गराइएको थियो। धार्मिक परम्परा अनुसार, स्कन्द पुराण मा वर्णन भएको कथाका आधारमा भगवान श्रीकृष्ण (जगन्नाथ) बहिनी सुभद्राको आग्रहमा दाजु बलराम सहित नगर दर्शनका लागि निस्किएका थिए। यही प्रसंगको सम्झनामा यो रथ यात्रा मनाउने परम्परा विकास भएको मानिन्छ।
यस वर्षको रथ यात्रा जानकी मन्दिर, विभिन्न धार्मिक संघसंस्था, र स्थानीय जनसमुदाय को संयुक्त आयोजनामा सम्पन्न भएको हो। कार्यक्रमका एक संयोजक तथा हिन्दू समाजका युवा समराज नेपालीका अनुसार, कोरोना महामारीको कारण केही वर्ष रोकिएको रथ यात्रा यस वर्ष देखि पुन: निरन्तर हुने भएको छ।
रथ यात्रामा स्थानीयवासी, श्रद्धालु, साधु-सन्त, तथा देश-विदेशबाट आएका पर्यटकहरूको उल्लेखनीय सहभागिता रहेको थियो। रथयात्राका क्रममा शहरको वातावरण भक्तिमय बनेको थियो भने जनकपुरधामको सांस्कृतिक पहिचान पुन: एकपटक उजागर भएको देखिएको छ।
सुरक्षा व्यवस्थालाई ध्यानमा राखी पर्याप्त संख्यामा सुरक्षाकर्मी परिचालन गरिएको थियो भने स्वयंसेवकहरूले भक्तजनलाई सहज रूपमा रथ यात्रामा सहभागी गराएका थिए।
आफ्नो प्रतिकृया दिनुहोस्