विरगंज। भदौं २४ गते GEN-Z आन्दोलनका क्रममा विरगंजमा भएको तोडफोड, आगजनी र लुटपाटपछि क्षतिको मूल्यांकनमा विरगंज महानगरपालिका र प्रहरीले फरक–फरक तथ्याङ्क सार्वजनिक गरेका छन् ।
महानगरपालिकाले करिब ११५ करोड रुपैयाँ भन्दा बढी सम्पत्ति नष्ट भएको दाबी गरेको छ भने जिल्ला प्रहरी कार्यालय पर्साले भने आफ्नो प्रतिवेदनमा १३ करोड रुपैयाँ बराबरको मात्र क्षति भएको उल्लेख गरेको छ ।
प्रहरीको प्रतिवेदन अनुसार, आन्दोलनकारीले महानगर कार्यालय भित्र रहेका सवारीसाधन, भवन र सामग्रीमा आगजनी गर्दा करिब १३ करोडको क्षति पुगेको हो । तर महानगरपालिकाका प्रमुख प्रशासकीय अधिकृत अरविन्दलाल कर्णले भने तथ्याङ्क फरक हुनुको कारण प्रहरीले कार्यालयसँग समन्वय नगरी प्रतिवेदन तयार पारेको बताए ।
कर्णका अनुसार, महानगरमा रहेका १७ वटा सवारीसाधन, १२ मोटरसाइकल र ४ भवनका सम्पूर्ण सामग्री जलेर नष्ट भएका छन् । आगलागीका कारण तीनवटा भवन पूर्णरूपमा क्षतिग्रस्त भई प्रयोगविहीन बनेका छन् भने नगर प्रमुख र उपप्रमुखको कार्यालय रहेको भवनमा आंशिक क्षति पुगेको छ ।
प्रहरी प्रतिवेदनले अन्य कार्यालयमा भएको क्षतिको पनि विवरण सार्वजनिक गरेको छ । जस अनुसार कुल १७ करोड २४ लाख रुपैयाँ बराबरको क्षति भएको उल्लेख छ । विवरण यसप्रकार छ :
आन्तरिक राजस्व कार्यालय : ६० लाख , नेपाल टेलिकम घटाघरस्थित कार्यालय : २ करोड , वीरगन्ज महानगरपालिका : १३ करोड , वडा नं. १० कार्यालय : ६ लाख , वडा नं. २६ कार्यालय : १० लाख , वडा नं. १४ कार्यालय : ३ लाख , जिरा भवानी गाउँपालिका कार्यालय : ५० लाख , वीरगन्ज कारागार : ३ लाख , विर्ता स्थित वाल सुधार गृह : ७ लाख , पोखरिया नगरपालिका कार्यालय : १५ लाख , चिनी मिल स्थित उच्च अदालत अस्थायी कार्यालय : २० लाख , भूमि जलस्रोत तथा सिंचाइ कार्यालय : ५० लाख
आफ्नो प्रतिकृया दिनुहोस्