रामेछाप। मानव बस्ती क्रमश: पातलिँदै जानु र जङ्गल क्षेत्र विस्तार हुँदै जाँदा ग्रामीण क्षेत्रका किसानहरू बाँदरको आतंकबाट हैरान भएका छन्। गाउँघरमा लगाइने बाली बाँदरले नष्ट गर्न थाले पछि धेरै स्थानमा किसानले बाली लगाउनै छाड्न थालेका छन्।
बाली लगाउने किसानका लागि अहिले सबैभन्दा ठूलो चुनौती नै बाँदरबाट बाली कसरी जोगाउने भन्ने बनेको छ। यही समस्यालाई ध्यानमा राख्दै रामेछापको मन्थली नगरपालिका–८ चिसापानीमा बाँदर नियन्त्रण तथा व्यवस्थापन समिति गठन गरिएको छ।
वडा कार्यालयको पहलमा समिति गठन गरिएको जानकारी दिँदै वडाध्यक्ष गोपाल श्रेष्ठले बाँदर नियन्त्रण प्रभावकारी नबने ग्रामीण भेगमा मानिसहरू बस्नै नसक्ने अवस्था आउन सक्ने चेतावनी दिए। उनका अनुसार चिसापानीका सबै किसानहरूको भेला गराएर बाँदर व्यवस्थापन तथा नियन्त्रण समिति गठन गरिएको हो।
सरकारले कृषि क्षेत्रमा विभिन्न सहयोग उपलब्ध गराए पनि बाँदरको कारण किसानले आफ्नै बाली खान नपाउने अवस्था बनेको वडाध्यक्ष श्रेष्ठले बताए। त्यसैले बाँदर नियन्त्रणका लागि स्थानीय तह, किसान र समुदाय सबैको सहकार्य आवश्यक रहेको उनको भनाइ छ।
वडाले बाँदर समात्ने व्यक्तिलाई प्रति बाँदर एक हजार रुपैयाँ नगद प्रोत्साहन स्वरूप प्रदान गर्ने व्यवस्था गरेको पनि उनले जानकारी दिए। समातिएका बाँदरलाई रङ लगाएर चिन्हित गरी सुरक्षित रूपमा छाड्ने कार्यक्रम समेत सञ्चालन गरिने तयारी रहेको छ।
स्थानीयका अनुसार बढ्दो जङ्गल क्षेत्रकै कारण बाँदर नियन्त्रण झनै कठिन बन्दै गएको छ। “बाँदर रुखको टुप्पोमै पुग्छ, बूढाबूढीले त धपाउनै सकिँदैन,” स्थानीयको गुनासो छ।
यसलाई नियन्त्रण गर्न वडाले बारी काल्नाका रुखहरू काँटछाँट र पतल्याउने कार्यक्रम समेत अघि सारेको छ। “बारी काल्नाहरू नै जङ्गल जस्तै भएपछि बाँदर त्यहीँ बस्न थालेका हुन्। त्यसैले तिनलाई आकर्षित नहोस् भन्ने उद्देश्यले काँटछाँट र पतल्याउने काम सुरु गर्न लागेका छौँ,” वडाध्यक्ष श्रेष्ठले बताए।
आफ्नो प्रतिकृया दिनुहोस्