ठिक ठाउँमा ताकेर मिसाइल हानेको छु :ओली

काठमाडौं : आफ्ना विभिन्न सन्दर्भ संग्रहित ‘संसदमा केपी शर्मा ओली’ ग्रन्थको मंगलबार राजधानीमा भएको लोकर्पण कार्यक्रममा पुर्व प्रधानमन्त्री तथा एमालेका अध्यक्ष केपी शर्मा ओलीले जनताका पक्षमा बोल्दा आफू अनियन्त्रित हुनु कमजोरी भएता पनि विचारमा कुनै त्रुटि नरहेको बताएका छन् ।

राजनीति लोकतन्त्रको लागि चाहिने र लोकतन्त्र जनताको लागि भएको उल्लेख गर्दै उनले त्यसलाई ठगी खाने भाँडो बनाउन खोजे लोकतन्त्र नटिक्ने बताएका छन् ।ओलीले भने ‘राजनीति केलाई चाहिन्छ भन्दा लोकतन्त्रलाई चाहिने हो । लोकतन्त्र जनता र समाजलाई, देशलाई चाहिन्छ । जसले समाज,देश र जनताको लागि काम गर्दैन दुई चार जना नेताको ठगीखाने भाँडो हुन्छ लोकतन्त्र भने त्यो लोकतन्त्र फेरि टिक्दैन ।’

लोकतन्त्रको विकल्प उन्नत लोकतन्त्र हुने उल्लेख गरेका उनले कहिलेकाँही लोकतन्त्रले नै धक्का खाने बताए । तर, आफूले निरन्तर संसदमा बोल्दा लोकतन्त्र र जनताको पक्षमा बोलेकोे भनाइ उनको छ । ओलीले संसदमा बोल्दा वा आफ्नो भाषण गर्दाका समय विचार उत्तेजक भए पनि आफूले लोकतन्त्र र जनताको पक्षमा बोल्ने क्रममा अनियन्त्रित हुने गरेको स्वीकारे ।

उनीप्रति ‘अनकन्ट्रोल मिसाइल’ जस्तै भाषण गर्ने व्यक्ति जस्तो लाग्छ भनेर गरेको टिप्पणी प्रति ओलीले भने, ‘दाहालजीले मलाई अनकन्ट्रोल मिसाइल भनेजस्तै मैले ड्याङड्याङ मिसाइल हान्दिने हो, त्यस पाराले बोलेँ । तर, यसको अर्थ सावधानीको कमी हो मेरो विचारमा त्रुटि होइन । मैले ठिक ठाउँमा ताकेर मिसाइल हानेको छु । तर, एउटा हान्दा पुग्ने ठाउँमा पाँच सातवटा हानेँ ।’

विभिन्न कालखण्डमा अविचलित रुपमा अत्यन्तै निष्ठापूर्वक देश, जनता र सुशासनको पक्षमा राजनीति गर्दै आएको दाबी गर्दै उनले त्यही धारलाई निरन्तरता दिने बताउँदै ‘मैले राजनीति गर्दा देखि अहिले सम्म अत्यन्तै निष्ठाको साथ गरेको छु र एक धारमा मेरो विचारहरुको प्रवाह भएको छ । चाहे त्यो ४८ साल होस्, ५८ साल होस्, ६८ होस्, ७८ होस् । चाहे आगामी दिनमा होस् । त्यो एउटै धारमा मेरो राजनीति गएको छ । त्यो देश, जनता र सुशासनप्रति निष्ठाको धारमा गएको छ,’ ओलीले भने ।

आफ्ना लागि देश र जनता भन्दा ठूलो अरु केही नभएको उल्लेख गर्दै उनले राजनीति भन्दा माथि देशको हित पार्नेगरी नीति बनाउनु पर्नेमा जोड दिदैं उनले संसद र बाहिर जहाँ बोले पनि आफूलाई माथि पार्न नभएर देश र जनतालाई माथि पार्न बोलेको चर्चा गरे ।

पार्टी अध्यक्ष ओलीले आफू मतभारमा नअल्झिएको जिकीर गर्दै भने, ‘म कुनै मतभारमा अल्झिएको छैन । मतभारभन्दा ठूलो कुरा देश हो जनता हो । देश र जनताका हितका निम्ति नीतिहरु बन्नुपर्दछ । नीतिका कारण देश र जनताका हितमा बोल्न सकिँदैन भन्ने हुँदैन । देशको हित जेसुकै होस् पहिले आफ्ना नीति पुष्टि गर्ने भनेर गरेका कामहरु मूर्खतापूर्ण हुने गर्दछन्,’ ।लोकार्पण गरिएको ग्रन्थमा ओलीले आज सम्म संसदमा बोलेका विषयवस्तु लाई संग्रहित गरिएको छ ।