काठमाडौं । जनता समाजवादी पार्टी (जसपा) का अध्यक्ष उपेन्द्र यादवले तराईका किसानहरूको समस्या दीर्घकालीन रूपमा बेवास्ता हुँदै आएको आरोप लगाउँदै तत्काल समाधान गर्न सरकारसँग माग गरेका छन्।
उखु किसानहरूको आन्दोलन प्रति ऐक्यबद्धता जनाउन बिहीबार माइतीघर पुगेका यादवले प्रधानमन्त्री केपी शर्मा ओलीलाई लक्षित गर्दै, “हेलिकप्टरको तेल मात्र खर्च गर्ने हो कि, किसानको समस्या पनि हल गर्ने हो ?” भनेर प्रश्न उठाए।
उनले किसानहरूको समस्या समाधानको नाममा पटक–पटक अनुदान र सहयोग आएको भए पनि त्यसलाई सदुपयोग नगरी किसानलाई झन् पेल्ने प्रवृत्ति कायम रहेको बताए। यादवले भने, “राणाकाल देखि नै तराईका किसानको अनुहार मन नपर्ने भएपछि पेल्ने गरिन्छ। यही प्रवृत्ति आजसम्म निरन्तर छ। अब प्रधानमन्त्रीले यसको जवाफ दिनु पर्छ।”
यादवले हालको सरकारले किसान प्रति गैरजिम्मेवार व्यवहार गरेको आरोप पनि लगाए। उनका अनुसार, नागरिक र किसान सडकमा आउँदा उनीहरूको आवाज सुन्ने र न्यायोचित समाधान खोज्ने दायित्व सरकारकै हो।
आफ्नो प्रतिकृया दिनुहोस्