२४ माघ ,जनकपुर । आसन्न प्रतिनिधिसभा निर्वाचनका लागि राष्ट्रिय स्वतन्त्र पार्टी (रास्वपा)बाट उम्मेदवारी दिएका सबै उम्मेदवारले केन्द्रीय कार्यालयमा करारपत्रमा हस्ताक्षर गर्नुपर्ने भएको छ।शनिबार जनकपुरधाममा रास्वपा द्वारा आयोजित बृहत् पार्टी प्रवेश कार्यक्रममा पार्टीका प्रवक्ता तथा धनुषा निर्वाचन क्षेत्र नं. ३ का उम्मेदवार मनिस झाले उक्त जानकारी दिएका हुन्।
कार्यक्रममा बोल्दै प्रवक्ता झाले अन्य पार्टीहरूको घोषणा पत्रको सट्टा रास्वपाले ‘वाचापत्र’ सार्वजनिक गर्ने निर्णय गरेको बताए। उनका अनुसार, चुनाव जिते पछि गर्ने तथा नगर्ने कामहरूको स्पष्ट प्रतिबद्धता उल्लेख गरिएको करारपत्र उम्मेदवारहरूले हस्ताक्षर सहित पार्टी केन्द्रीय कार्यालयमा बुझाउनु पर्नेछ।
झाले कुनै पनि उम्मेदवार माथि भ्रष्टाचारको आरोप पुष्टि भए आजीवन पार्टीबाट निष्कासन गरिने स्पष्ट चेतावनी दिए। साथै उम्मेदवारहरूको निजी बैंक खाताको निगरानी पनि केन्द्रीय कार्यालयबाट गरिने जानकारी दिए।
प्रवक्ता झाले आफू अधिकतम १० वर्ष मात्रै सक्रिय राजनीतिमा रहने र त्यसपछि नयाँ पुस्तालाई अवसर दिने योजना रहेको बताए। भविष्यमा प्रशिक्षकको भूमिकामा रहेर नयाँ पुस्तालाई विकास र राजनीति सम्बन्धी प्रशिक्षण दिने उनले उल्लेख गरे।
आसन्न निर्वाचनमा रास्वपाको लक्ष्य जित हासिल गर्नु मात्र नभई ऐतिहासिक मत प्राप्त गर्नु रहेको उनले बताए। मधेश प्रदेशबाट सबैभन्दा बढी मत ल्याएर संसदमा मधेशको राजनीतिक शक्ति स्थापित भएको सन्देश दिने उद्देश्य रहेको पनि उनले बताए।कार्यक्रममा विभिन्न पार्टी परित्याग गरी २०० भन्दा बढी स्थानीय नेता तथा कार्यकर्ता रास्वपामा प्रवेश गरेका थिए।
आफ्नो प्रतिकृया दिनुहोस्