३ फागुन ,काठमाडौं/जनकपुर । फाल्गुन कृष्ण चतुर्दशीका अवसरमा आज देशभर महाशिवरात्रि पर्व श्रद्धा र भक्तिपूर्वक मनाइँदैछ । धार्मिक परम्परा अनुसार चतुर्दशी तिथिमा भगवान् शिवको पूजा, आराधना र व्रत बस्ने चलन रहेकाले देशभरका शिवालयहरूमा भक्तजनको ठूलो भीड लागेको छ ।
त्यस्तै, मधेश प्रदेशको धार्मिक नगरी जनकपुरधाममा पनि महाशिवरात्रि पर्व विशेष श्रद्धा र उत्साहका साथ मनाइएको छ । जनकपुरधामका बाबा भोलेनाथ मन्दिर, शिव मन्दिर, मटिहानी, धनुषा तथा आसपासका शिवालयहरूमा साँझदेखि भक्तजनको उल्लेख्य भीड लागेको छ । भक्तजनहरूले व्रत, उपवास र विशेष पूजा–आराधना गर्दै दूध, बेलपत्र र धतुरो अर्पण गरेका छन् ।
धार्मिक मान्यता अनुसार आज रातभर जाग्राम बसेर शिवजीको पूजा गरे सुख–शान्ति तथा मोक्ष प्राप्त हुने विश्वास रहेको छ । जनकपुरधाममा भजन–कीर्तन, आरती र धार्मिक कार्यक्रमहरू रातभर सञ्चालन हुने आयोजकहरूले बताएका छन् ।
पशुपतिनाथ मन्दिर क्षेत्रमा आज दिनभर भक्तजन, साधुसन्त र तीर्थयात्रीहरूको चहलपहल बढेको छ । छिमेकी देश भारतबाट समेत हजारौँ श्रद्धालु पशुपतिनाथ दर्शनका लागि काठमाडौं आएका छन् ।महाशिवरात्रिका अवसरमा पशुपतिनाथ मन्दिरका चारै ढोका बिहान २ बजेदेखि खोलिएका थिए ।
पशुपति क्षेत्रमा गाँजा, भाङ, धतुरो लगायत लागुपदार्थ निषेध गरिएको छ भने सुरक्षा व्यवस्था कडा पारिएको छ । पशुपतिनाथसँगै गोकर्णेश्वर, डोलेश्वर महादेव लगायत उपत्यकाका शिवालय तथा राजधानी बाहिरका विभिन्न मन्दिरहरूमा पनि आज रातभर पूजाआराधना भइरहेको छ ।
आफ्नो प्रतिकृया दिनुहोस्