२५ फागुन,सर्लाही। सर्लाहीको चन्द्रनगर गाउँपालिकाका युवाहरूले राष्ट्रिय स्वतन्त्र पार्टी (रास्वपा) का उम्मेदवारहरूको जितको कामना गर्दै गरेको भाकल पूरा भए पछि गाउँको कुलदेवता ब्रह्मबाबा मन्दिरमा ५५ किलो मिठाई चढाएका छन्।
चन्द्रनगर गाउँपालिका–३ स्थित कोरियाही टोलका युवाहरूले प्रतिनिधिसभा निर्वाचनको मिति घोषणा भएपछि देशभर रास्वपाका उम्मेदवारहरू विजयी होऊन् भन्ने कामना गर्दै ब्रह्मबाबा मन्दिरमा ५५ किलो मिठाई चढाउने र चमेली माई मन्दिरमा एउटा बोका बली दिने भाकल गरेका थिए।
युवाहरूका अनुसार सर्लाहीबाट रास्वपाका उम्मेदवारहरू नीतिमा भण्डारी (कार्की), रविन महतो, नरेन्द्र साह कलवार तथा डा. अमरेश सिंह सहित देशभरका उम्मेदवारहरूले सफलता पाए पछि आफ्नो भाकल पूरा भएको भन्दै आइतबार ब्रह्मबाबा मन्दिरमा ५५ किलो मिठाई अर्पण गरिएको हो।
चन्द्रनगर–३ का युवा पवन महतोका अनुसार अब केही दिन भित्रै चमेली माई मन्दिरमा बोका बली दिने कार्यक्रम पनि तय गरिएको छ। अर्का युवा विकास कुमार महतोले काठमाडौं महानगरपालिकाको मेयरका रूपमा बालेन साहले विभिन्न क्षेत्रमा विकासको पहल गरेको उल्लेख गर्दै अब देशको नेतृत्वमा पुग्दा मुलुकभर विकास र समृद्धि आउने विश्वास व्यक्त गरे।(राजेन्द्र बिश्वकर्मा)
आफ्नो प्रतिकृया दिनुहोस्