७ भदौ,साउन शुक्ल एकादशी,जनकपुरधाम,(आशिष कुमार मण्डल) : जनकपुरधाम उपमहानगरपालिका-१६, कपिलेश्वरका स्थानीय बासिन्दाले विद्युत समस्याको विरोधमा आज बिहानै देखि हुलाकी राजमार्ग अवरुद्ध गरी आन्दोलन गरेका छन्।
नेपाल विद्युत प्राधिकरण जनकपुरधाम वितरण केन्द्रले वर्षौंदेखि ‘सिटी फिडर’बाट हुँदै आएको विद्युत आपूर्तिलाई केही दिनयता ‘ग्रामीण फिडर’मा स्थानान्तरण गरेपछि समस्या सुरु भएको स्थानीयको भनाइ छ। फिडर परिवर्तनसँगै भोल्टेजको समस्या, पटक-पटक बत्ती जाने र हिजोदेखि विद्युत सेवा पूर्ण रूपमा अवरुद्ध भएपछि स्थानीय आक्रोशित बनेका हुन्।
४० डिग्रीको अत्याधिक गर्मीमा विद्युत नहुँदा पानीको अभाव, मोबाइल तथा इन्भर्टर चार्ज गर्न नपाएको र सुत्न समेत कठिनाइ भएको भन्दै उनीहरू आन्दोलित भएका हुन्। आन्दोलनकारीहरूले आफ्नो पुरानो ‘सिटी फिडर’मा लाइन जडान नभएसम्म आन्दोलन जारी राख्ने चेतावनी दिएका छन्।
यस सम्बन्धमा प्रतिक्रिया लिन नेपाल विद्युत प्राधिकरण जनकपुरधाम वितरण केन्द्रसँग सम्पर्क गर्ने प्रयास गरिए पनि सम्पर्क हुन सकेन।
आफ्नो प्रतिकृया दिनुहोस्