जनकपुरधाम अस्तव्यस्त

१३ कात्तिक, जनकपुरधाम : मधेस प्रदेशको राजधानी जनकपुरधाम अन्य दिनको तुलनामा आज अस्तव्यस्त बनेको छ । छठ पर्वको मुख्य दिन आज ‘सँझुका अर्घ्य’ परेकाले बजारमा अत्यधिक भीड बढ्दा अस्त-व्यस्त बनेको हो । बजारमा मानिस र सवारीसाधनको अत्यधिक भीड बढे पनि ट्राफिक प्रहरीले व्यवस्थापन गर्न सकेको छैन । सहरका मुख्यचोकमा अत्यधिक भीड देखिएको छ । पोखरी घाटहरूमा जाने बजारका मूल सडकहरू पनि बिहानै देखि भरिभराउ हुँदा ट्राफिक व्यवस्थापनमा चुनौती थपिएको छ ।

जिल्ला ट्राफिक प्रहरी कार्यालय धनुषाका प्रमुख चन्द्रभुषण यादवले नगरभित्रका पोखरी घाटहरूलाई बढी केन्द्रित गरेर जनशक्ति परिचालन गरिएकाले सडकमा बढेको भीडभाड व्यवस्थापन गर्न समस्या भएको जानकारी दिनुभयो । उहाँले नेपाल प्रहरीसँग समन्वय गरेर नियमित ड्युटी बाहेक नगरभित्र १५ ट्राफिक प्रहरी खटाइएको बताउनु भयो । उता, छठ पर्वमा हुनसक्ने सम्भावित घटनालाई दृष्टिगत गर्दै नेपाल प्रहरीले पनि नगरभित्र म्यादी र जनपद गरी चार सय प्रहरी परिचालन गरेको जिल्ला प्रहरी कार्यालय धनुषाका प्रवक्ता प्रहरी नायव उपरीक्षक प्रदीपबहादुर क्षेत्रीले बताउनुभयो ।(रासस)