२० चैत्र,धनुषा: जनकपुरधाम उपमहानगरपालिका वडा नम्बर १४, प्रगतिनगरमा मन्दिरको सार्वजनिक जग्गामा मधेश प्रदेशका सांसद जंगीलाल राय यादवले अवैध रूपमा घर निर्माण गरिरहेको खुलासा भएको छ। स्थानीयवासीको कडा विरोधका बावजुद सांसद यादवका छोरा डा. अमित यादवले दिनरात कामदार परिचालन गरी तीव्र रूपमा घर निर्माण जारी राखेका छन्।
स्थानीयले अख्तियार दुरुपयोग अनुसन्धान आयोगमा निवेदन दिँदै जिल्ला प्रशासन कार्यालय धनुषाका प्रमुख जिल्ला अधिकारी रामु राज कडरियालाई सामूहिक ध्यानाकर्षण पत्र बुझाएका छन्। तर, अवैध निर्माण रोक्न कुनै कदम नचालिएको उनीहरूको गुनासो छ।
विवादको पृष्ठभूमि : जनकपुरधाम वडा नम्बर ८, बिहार कुण्डस्थित विजय राघव कुञ्जका पूजारी रामसागर दासले २०६८ सालमा मन्दिरको नाममा रहेको सार्वजनिक जग्गा सांसद यादवलाई बेचेका थिए। उक्त जग्गा ६ कट्ठा ५ धुर ३ कनमा फैलिएको छ, जसको सिट नम्बर १६९–१२७५–२४ रहेको छ। पूजारी दासले वार्षिक ४० किलो धान बुझाउने शर्तमा २२ लाख रुपैयाँमा जग्गा बिक्री गरेको स्वीकार गरेका छन्।
तर, स्थानीयबासीले यो जग्गा सार्वजनिक सम्पत्ति भएको र व्यक्तिगत स्वार्थका लागि प्रयोग गर्न नदिने अडान राखेका छन्। उनीहरूले सांसद यादवले राजनीतिक शक्तिको दुरुपयोग गरी सार्वजनिक सम्पत्तिको कब्जा गरेको आरोप लगाएका छन्।
स्थानीयको कदम : स्थानीय युवा उदय कुमार यादवको नेतृत्वमा सोभित साह, विन्देश्वर यादव, महेन्द्र यादव, जागेश्वर यादव, राम सरोज यादव, ललिता यादव लगायतका दर्जनौं स्थानीयले सार्वजनिक सम्पत्तिको संरक्षणको माग राख्दै प्रशासनसँग तुरुन्त कदम चाल्न आग्रह गरेका छन्। उनीहरूले अख्तियार दुरुपयोग अनुसन्धान आयोगमा उजुरी दर्ता गरिसकेका छन्।
सांसद यादवको पक्ष : सांसद यादव पक्षले भने जग्गा वैधानिक रूपमा किनिएको दाबी गरेको छ। पूजारी रामसागर दासले पनि मन्दिरको नाममा रहेको उक्त जग्गा सांसद यादवलाई बेचेको पुष्टि गरेका छन्। सांसद यादवले स्थानीयले अनावश्यक रूपमा विवाद सिर्जना गरिरहेको आरोप लगाएका छन्।
तर, स्थानीयको दाबी छ कि सार्वजनिक सम्पत्ति मन्दिरकै नाममा हुनुपर्ने र यसको खरिद-बिक्री अवैध रहेको छ। उनीहरूले सांसद यादवले आफ्नो राजनीतिक प्रभाव प्रयोग गरी निजी स्वार्थ पूर्ति गर्न खोजेको आरोप लगाएका छन्।
स्थानीय बासिन्दाको निरन्तर विरोधका बाबजुद सांसद यादवका छोरा डा. अमित यादवले निर्माण कार्यलाई तीव्र बनाएका छन्। २४ घण्टा कामदार परिचालन गरी घर निर्माण कार्य जारी राखिएको छ।
अदालतमा जाने तयारी : स्थानीय बासिन्दाले सांसद यादवको अवैध निर्माण रोक्न उच्च अदालत जनकपुरमा मुद्दा दर्ता गर्ने तयारी गरिरहेका छन्। उनीहरूले सार्वजनिक सम्पत्तिको रक्षा गर्न कानुनी प्रक्रिया अगाडि बढाउने अडान लिएका छन्।
आफ्नो प्रतिकृया दिनुहोस्