१० जेठ,जनकपुर: नेपाली कांग्रेसका नेता विमलेन्द्र निधिले ‘पानीको देश’ भनेर चिनिने नेपालमा शुद्ध पिउने पानीको चरम अभाव रहेको बताएका छन्।
शनिबार जनकपुरधाममा नेपाल खानेपानी संस्थान कर्मचारी संघ द्वारा आयोजित कार्यशाला गोष्ठीमा बोल्दै उनले पिउने पानीको समस्या समाधानका लागि सरकारलाई वैज्ञानिक नीति अवलम्बन गर्न सुझाव दिए।
नेता निधिले तराई–मधेशमा जमिनमुनिको पानीको सतह दिन-प्रतिदिन घट्दै गएको प्रति गम्भीर चिन्ता व्यक्त गरे। उनले ग्राउन्ड वाटर रिचार्जका वैज्ञानिक तरिका अवलम्बन गर्नु पर्नेमा जोड दिए।
मेलम्ची आयोजना बारम्बार प्रयास गरिए पनि काठमाडौंका बासिन्दाले अझै सहज रूपमा पानी नपाएको भन्दै उनले असन्तुष्टि व्यक्त गरे।
चुरे विनासका कारण तराई क्षेत्रमा पानीको स्रोत संकटमा परेको उल्लेख गर्दै उनले अब नदी तथा झरनाको पानीलाई पिउन योग्य बनाउन प्रविधिको प्रयोग गर्न सरकारलाई सुझाव दिए।
कार्यक्रममा उनले नेपाल खानेपानी संस्थानले हाल सम्म दिएको सेवाको प्रशंसा गर्दै आगामी दिनमा अझ प्रभावकारी र गुणस्तरीय सेवा दिन आग्रह पनि गरे।
आफ्नो प्रतिकृया दिनुहोस्