२४ जेठ,काठमाडौं : नेकपा एकीकृत समाजवादीका अध्यक्ष माधव कुमार नेपालले आफू विरुद्ध पूर्वाग्रहका आधारमा भ्रष्टाचारको मुद्दा लगाउने प्रयास भइरहेको आरोप लगाएका छन्।
मधेस प्रदेश सम्पर्क समितिको प्रथम अधिवेशन लाई सम्बोधन गर्दै अध्यक्ष नेपालले आफ्नो पार्टीको बढ्दो राजनीतिक प्रभाव देखेर केही व्यक्तिहरू आत्तिएको र बदला लिने भावना बोकेर गलत मुद्दा चलाउन खोजिएको बताएका हुन्।
“नेपालको राजनीतिमा अहिले हाम्रो पार्टीको भूमिका महत्त्वपूर्ण छ,” उनले भने, “यही कारणले केही व्यक्ति आतंकित भएका छन्, पूर्वाग्रह राखेर बसेका छन्। त्यसैको उदाहरण हो — म माथि भ्रष्टाचारको मुद्दा लगाउने प्रयास।”
अध्यक्ष नेपालले आफूले कहिल्यै घुस नलिएको र कुनै अनुचित लाभ लिएको प्रमाण छैन भन्दै भ्रष्टाचारको आरोप निराधार भएको दाबी गरे। “मैले कसै सँग एक रुपैयाँ पनि घुस लिएको छैन, कुनै जग्गा अपचलन गरेको छैन, देश वा जनता लाई नोक्सान हुने काम कहिल्यै गरेको छैन,” उनले स्पष्ट पारे।
त्यस्तै, उनले न्यायालय प्रति विश्वास रहेको उल्लेख गर्दै भने, “गलत आरोपहरूमा पनि हामी दृढताका साथ उभिन्छौं। मलाई न्यायालयले निष्पक्ष न्याय दिनेमा पूर्ण विश्वास छ। हामीले सधैं भनेका छौं — नबिराउनु, नडराउनु।”
आफ्नो प्रतिकृया दिनुहोस्