२१ असार,जनकपुरधाम । पूर्व उपप्रधानमन्त्री तथा प्रतिनिधिसभा सदस्य बिमलेन्द्र निधिले जनकपुरका प्रमुख विकास योजनाहरूमा नेकपा एमालेले सुनियोजित अवरोध गरिरहेको आरोप लगाएका छन्।
शनिबार जनकपुरधाम स्थित नेपाली कांग्रेस धनुषाको जिल्ला कार्यालयमा आयोजित पत्रकार सम्मेलनमा बोल्दै नेता निधिले धनुषा क्षेत्र नं. ३ र ४ बाट निर्वाचित एमाले प्रतिनिधिहरुले राजर्षि जनक विश्व विद्यालयको केन्द्रीय भवन निर्माणमा अवरोध खडा गरिरहेको दाबी गरे।
उनले भने, “राजर्षि विश्वविद्यालय स्थापनाको प्रयासका क्रममा पहिले सहयोग गरे जस्तो देखिए पनि अहिले एमालेका नेताहरु नै त्यसको भवन निर्माण रोक्न सकृय छन्।”
निधिका अनुसार, विश्वविद्यालय स्थापनाका क्रममा एमालेकै केन्द्रीय नेताहरुलाई अवरोध नगर्न कांग्रेसले काठमाडौंमा समर्थन समेत गरेको थियो। तर अहिले त्यहि दलका स्थानीय नेताहरू अवरोध गरिरहेका छन्।
त्यस्तै, नगराईन नगरपालिकामा समेत एमाले नेताहरूले बजेट पास हुन नदिएको र मेयरको अधिकार कटौती गर्ने प्रस्ताव सहित कार्यविधि बनाउन दबाब दिएको आरोप निधिले लगाए। “सत्ता गठबन्धनमा रहेका दलहरूको न्यूनतम शिष्टाचार एमाले नेता बाट देखिएको छैन,” उनले गुनासो गरे।
जनताको शिक्षा र पूर्वाधार सँग जोडिएको जस्तो महत्वपूर्ण विषयमा एमालेले अवरोध गर्नु दु:खद भएको भन्दै निधिले कुनै पनि हालतमा धनुषाको फुलगामा क्षेत्रमा राजर्षि जनक विश्वविद्यालयको भवन बनाइने स्पष्ट गरे।
“जनताको हितमा कांग्रेस दृढ छ, विश्वविद्यालय भवन निर्माणका लागि आवश्यक सबै पहल हामी गर्छौं,” उनले प्रतिवद्धता जनाए।
आफ्नो प्रतिकृया दिनुहोस्