फागुन १८, जनकपुरधाम: मधेश प्रदेशको राजधानी जनकपुरधाममा लघुवित्त र मिटरब्याजीको विरुद्धमा संघर्ष चर्केको छ। मिटरब्याजी तथा लघुवित्त पीडितहरुले ब्यानर, प्लेकार्ड सहित नाराबाजी गर्दै नगरमा विरोध प्रदर्शन गरेको हो । लघुवित्तहरूको ब्याजदर तथा मिटरब्याजी विरुद्ध पीडितहरुले चर्को बिरोध प्रदर्शन गर्दै रंगभूमि मैदान देखि जानकी चौक,धनुषा पथ, मिल्स एरिया ,भानुचौक,जनक चौक, रामचौक, जिल्ला प्रहरी कार्यालय ,जिल्ला प्रशासन कार्यालय हुदैं कदमचोक सम्मको परिक्रमा गरेका थिए ।
प्रदर्शनमा सहभागीहरूले सुदखोरहरूलाई गिरफ्तार गर्न, तमसुक व्यवस्था खारेज गर्न, मिटरब्याजीको सम्पति छानबिन गर, पीडितको सम्पती फिर्ता गर्न, मिटरब्याजीले गरेको शोषणको छानबिन गरी दोषीलाई कारवाही गर्न लगायतका भिषण नाराहरू लगाएका थिए। बिरोध प्रदर्शन गर्ने क्रममा प्रदर्शनकारिहरु मुख्यमन्त्री तथा मन्त्रीपरिषद्को कार्यालयमा प्रवेश गर्ने प्रयास गरेका थिए। सो प्रयासलाई प्रहरीले निस्तेज बनाएका थिए।
मिटरब्याज तथा लघुवित्त संघर्ष समितिका संयोजक मनोजकुमार पासवानले मिटरब्याजी बिरुद्ध संघर्ष समितिले १० सूत्रिय माग राखेको भन्दै उनले मिटरब्याज पीडितमाथि सुदखोरको शोषण बढेको, मुद्दा लगाएर जेल पठाउने काम गरिरहेको र घर, घडेरी, सम्पती गैरकानूनी रुपमा कब्जा गर्ने काम गरेको बताएका छन् ।
संर्घष समितिले मिटर ब्याजीलाई कारबाही गर्नुपर्ने, पीडितहरुको जफत गरिएको सम्पती फिर्ता गर्नुपर्ने, मिटर ब्याजीको सम्पती छानबिन हुनु पर्ने, मिटर ब्याजीबाट पीडितलाई न्याय दिनुपर्ने, मिटर ब्याजीबाट पीडितमाथि गरिएको शोषणको छानबिन गरी दोषीलाई कारबाही गर्नुपर्ने माग गरेको छ। यस्तै सहुलियत दरमा ऋणको व्यवस्था, तमसुक व्यवस्था खारेज गर्नुपर्ने, लघुवित्तको ज्यादती बन्द हुनुपर्ने, गरिबलाई झुक्याएर पैसा लुट्ने लघुवित्त माथि कारबाही गर्नुपर्ने लगायतको माग रहेको छ ।
‘गाउँ-गाउँमा लघुवित्तको पनि त्यतिकै आतंक भएको र मिटर व्याजले कैयौँ मानिसलाई घरबारविहीन बनाएको छ’, बैंकहरुको चर्को ब्याजदर, लघुवित्त र मिटरब्याजीहरुको कारण आम-नागरिकहरु क्षिन्न भिन्नभै घरबारविहिन बन्नुपर्नेका कारण आत्महत्या गर्नुपर्ने समेतको अवस्था श्रृजना भएको बताउँदै सरकारलाई गरिब तथा सोझा जनताहरुको समस्याहरूमा कुनै सरोकार नभएको सपही निवासी मिटरब्याजीबाट पिडित रहेका जनकपुरधाम-२ का एक नागरिकले आफ्नो आक्रोश पोखेका छन् ।
आफ्नो प्रतिकृया दिनुहोस्