काठमाडौं । नेपाली कांग्रेसका नेता प्रदीप पौडेलले जेनजी आन्दोलनले समाजमा गहिरो रूपमा जकडिएका र राजनीतिक दल तथा व्यवस्थाले सुधार गर्न नसकेका विषयलाई उठाएको बताएका छन्। उनले ती विषय अब रुपान्तरणको यात्रा मार्फत सम्बोधन हुनुपर्ने आवश्यकता औंल्याए।
रामेछापमा पत्रकारसँगको अन्तरक्रियामा बोल्दै पौडेलले आन्दोलनका क्रममा गैरजेनजी समूहले स्वार्थ पूर्ति गर्ने उद्देश्यले उत्पात मच्चाएको दाबी गरे। “जेनजी आन्दोलन विषयविहीन थिएन, यो दलहरुले सुधार गर्न नचाहेका वा नसकेका मुद्दा उठाइएको आन्दोलन हो,” उनले भने।
उनका अनुसार आन्दोलनका माग गम्भीर र संवेदनशील थिए तर त्यसकै आडमा स्वार्थका खेल पनि देखियो। “नेपालमा अहिले सम्मकै ठूलो क्षति भएको छ। गैरजेनजीले आन्दोलन भित्र घुसी उत्पात मच्चाए र राष्ट्रिय/अन्तर्राष्ट्रिय स्वार्थले परिस्थिती जटिल बनायो,” पौडेलले टिप्पणी गरे।
आन्दोलनको पहिलो दिनमै ठूलो संख्यामा युवाले सहादत प्राप्त गरेको घटनालाई गम्भीर रूपमा लिनु पर्ने भन्दै उनले छानबिन आवश्यक रहेको बताए। “राज्यले आफ्ना नागरिक र सम्पत्ति जोगाउन नसकेको विषय प्रश्न बनेको छ। यसलाई सामान्य रूपमा लिन मिल्दैन, सरकारले तत्काल छानबिन गर्नु पर्छ,” उनले जोड दिए।
कांग्रेस केन्द्रीय सदस्य तथा पूर्वमन्त्री पौडेलले अब देश स्थिरता र सही मार्ग तर्फ अघि बढ्नु पर्ने उल्लेख गर्दै निष्पक्ष र शान्तिपूर्ण निर्वाचन नै समाधानको बाटो भएको बताए। “राज्यका संयन्त्रमा उठेका प्रश्नको जवाफ दिनु पर्छ, तभी समस्या समाधान हुन्छ,” उनले स्पष्ट पारे।
पौडेलले आफू सरकारको क्याबिनेटमा अन्तिम समयसम्म जेनजी आन्दोलन र सामाजिक सञ्जाल सम्बन्धी विषय उठाउने पहिलो व्यक्ति भएको पनि स्मरण गरे। उनले सामाजिक सञ्जाल बन्द गर्नु हुँदैन भन्ने अडान राखेको बताए।
त्यस्तै, २३ गते नै राजीनामा दिने मनस्थितिमा रहे पनि पार्टीसँग छलफल आवश्यक भएकाले भोलिपल्ट मात्र राजीनामा दिएको बताए। “प्रधानमन्त्री लाई समेत यस्तो अवस्थामा पदमा बसिरहनु हुँदैन भन्ने सोचेर राजीनामा बुझाउन बालुवाटार जाँदै थिएँ, तर परिस्थिती बदलिएकाले अन्तत: सामाजिक सञ्जाल मार्फत नै राजीनामा दिएको हुँ,” उनले सुनाए।
आफ्नो प्रतिकृया दिनुहोस्