जनकपुर । मधेश प्रदेशमा नयाँ सरकार गठनको राजनीतिक रस्साकस्सी पछि अन्तत: लोकतान्त्रिक समाजवादी पार्टी (लोसपा)का नेता जितेन्द्र सोनल मुख्यमन्त्री नियुक्त भएका छन्।
प्रदेश प्रमुख सुमित्रा सुवेदी भण्डारीले संविधानको धारा १६८(२) अनुसार बुधबार सोनललाई प्रदेशको चौथो मुख्यमन्त्रीका रूपमा औपचारिक रूपमा नियुक्त गरेकी हुन्। उनले आजै प्रदेश प्रमुखको कार्यालयमा उपस्थित भएर नियुक्ति-पत्र ग्रहण गरेका छन्।
यस अघि मधेश प्रदेशमा नयाँ सरकार गठनका लागि विभिन्न दलबीच तीव्र राजनीतिक चलफल चलेको थियो।मंगलबार तत्कालीन मुख्यमन्त्री सतिश कुमार सिंहले राजीनामा दिएपछि प्रदेश प्रमुखले नयाँ सरकार गठनका लागि बुधबार दिउँसो ४ बजे सम्म समय निर्धारण गरेकी थिइन्।
सोही समयसीमा भित्र लोसपाको नेतृत्वमा पाँच दलीय गठबन्धनले नयाँ सरकार गठनको दाबी पेश गरेको थियो।गठबन्धनमा लोसपा, जनता समाजवादी पार्टी (जसपा) नेपाल, नेकपा (माओवादी केन्द्र), नेकपा (एकीकृत समाजवादी) र जनमत पार्टीका केही सांसद सहभागी छन्।यी पाँच दलका ५६ जना प्रदेशसभा सदस्यले संयुक्त रूपमा सोनलको नेतृत्वमा सरकार गठनको दाबी पेश गरेका थिए।
यसअघि नेपाली कांग्रेसले पनि आफ्नो नेतृत्वमा सरकार बनाउन प्रयास गरेको थियो।कांग्रेस संसदीय दलका नेता कृष्ण प्रसाद यादवको नेतृत्वमा एमाले र जनमत पार्टीको समर्थनसहित सरकार गठनको दाबी प्रदेश प्रमुखसमक्ष बुझाइएको थियो। तर अन्तिम समयमा जनमत पार्टीले कांग्रेसको साथ छोड्दै लोसपाको नेतृत्वमा बन्न लागेको नयाँ गठबन्धनमा सहभागी हुने निर्णय गरेपछि सत्ता समीकरण लोसपाको पक्षमा पुगेको हो।
मंगलबार राति देखि नै चलेको बैठकमा जसपा नेपालका अध्यक्ष उपेन्द्र यादव र लोसपाका अध्यक्ष महन्त ठाकुरको उपस्थितिमा गठबन्धन बीच अन्तिम सहमति भएको थियो।त्यसपछि बुधबार बिहान नै गठबन्धनका प्रतिनिधिहरूले प्रदेश प्रमुखलाई नयाँ सरकार गठनको दाबी बुझाएका थिए।
यससँगै मधेश प्रदेशमा अब लोसपाको नेतृत्वमा नयाँ सरकार गठन हुने भएको छ।मुख्यमन्त्री सोनलले छिट्टै नयाँ मन्त्रिपरिषद् गठन गरी राजनीतिक स्थायित्व र प्रदेशको विकासलाई प्राथमिकता दिने बताएका छन्।
आफ्नो प्रतिकृया दिनुहोस्