२२ साउन,जनकपुरधाम :मधेश सरकारले ७ दिन भित्र प्रदेश सरकार लाई प्रहरी समायोजन गरी हस्तान्तरण गर्न प्रदेश प्रमुख मार्फत प्रधानमन्त्री लाई गम्भीर ध्यानाकर्षण गराएको छ ।गृह तथा संचार मन्त्री भरत प्रसाद साह को नेतृत्वमा गएको मन्त्रीहरु सहितको टोलीले प्रदेश प्रमुख हरि शंकर मिश्र मार्फत प्रधानमन्त्री शेर बहादुर देउवा लाई ध्यानाकर्षण पत्र बुझाएको हो ।
नेपालको संविधान को धारा २६८ ले प्रदेश प्रहरी संगठनको ब्यवस्था गरेको तथा अनुसुचि ६ को कम संख्या १ मा प्रहरी, शान्ती सुरक्षा सम्बन्धी अधिकार प्रदेश सरकारको क्षेत्राधिकार भित्र रहेपनि प्रहरी समायोजन नहुँदा प्रदेश सरकारले सरकारको अनुभूति गर्न नसकेको हुदा अविलम्ब प्रहरी समायोजन गरी प्रदेश सरकारलाई हस्तान्तरण गर्न आग्रह गरेको छ ।
प्रहरी हस्तान्तरणको लागि प्रधानमन्त्री लाई यस अघि नै ज्ञापनपत्र समेत बुझाई सकेको स्मरण गराउदै मधेश सरकारले एक साता भित्र प्रहरी समायोजन नगरिए शान्तीपूर्ण तथा अहिंशात्मक आन्दोलन गर्न बाध्य हुने चेतावनी समेत दिएका छन्। मधेश सरकार को आयोजनामा जनकपुरधाममा सम्पन्न ६ वटा प्रदेशको गृहमन्त्री स्तरीय भेला ले यथाशिघ्र समायोजन हुनु पर्ने माँग सहितको घोषणा पत्र समेत जारी गरेको थियो ।
ध्यानाकर्षण पत्र बुझाउने टोलीमा उद्योग,पर्यटन तथा वनमन्त्री शत्रुघन महतो,भौतिक पूर्वाधार विकास मन्त्री राम सरोज यादव, खानेपानी तथा उर्जा मन्त्री ओम प्रकाश शर्मा, कृषि मन्त्री विजय कुमार यादव सहित सहभागी रहेका थिए ।ध्यानाकर्षण पत्र बुझ्दै प्रदेश प्रमुख मिश्रले ध्यानाकर्षणपत्र आजै प्रधानमन्त्री कार्यालयमा पठाउने बताएका छन् ।
आफ्नो प्रतिकृया दिनुहोस्