४ चैत्र,(धर्मराज),जनकपुरधाम: मधेश प्रदेशका मुख्यमन्त्री सतिशकुमार सिंहको गोलाप्रथा बाट केन्द्राध्यक्ष चयन गर्ने प्रस्ताव प्रति नेपाल शिक्षक संघ, मधेश प्रदेश समितिले कडा आपत्ति जनाएको छ। संघका अध्यक्ष परशुराम यादव र महासचिव विजय कुमार झाले संयुक्त प्रेस विज्ञप्ति जारी गर्दै मुख्यमन्त्रीको धारणा हास्यास्पद र दोषपूर्ण रहेको टिप्पणी गरेका छन्।
शिक्षक संघले माध्यमिक शिक्षा परीक्षा (एसईई) लाई निष्पक्ष, मर्यादित र भयमुक्त वातावरणमा सञ्चालन गर्नु पर्ने साझा चाहना रहेको उल्लेख गर्दै, तर त्यसका लागि प्रदेश सरकारले नियम विपरीत कदम चाल्न नहुने स्पष्ट पारेको छ।
“राष्ट्रिय परीक्षा बोर्डको निर्देशिका अनुसार परीक्षा सञ्चालन, केन्द्राध्यक्ष, सहायक केन्द्राध्यक्ष तथा निरीक्षकहरूको व्यवस्था हुने कानुनी प्रावधान छ। परीक्षा नजिकिँदै गर्दा गोलाप्रथा द्वारा केन्द्राध्यक्ष छनोट गर्ने निर्णयले एसईई जस्तो संवेदनशील परीक्षा लाई जोखिममा पार्ने काम भएको छ,” विज्ञप्तिमा उल्लेख छ।
शिक्षक संघले मधेश प्रदेश सरकारको यस्तो गैर-जिम्मेवार क्रियाकलापको घोर भर्त्सना गर्दै परीक्षालाई स्वच्छ र मर्यादित ढंगले सञ्चालन गर्नु पर्ने माग गरेको छ। मुख्यमन्त्री सिंहले केन्द्राध्यक्ष नियुक्ति गोलाप्रथा बाट हुनु पर्ने नभए एसईई परीक्षा बाट बाहिरिने चेतावनी दिएका थिए, जस प्रति शिक्षक संघले गम्भीर ध्यानाकर्षण गराएको छ।
आफ्नो प्रतिकृया दिनुहोस्