११ चैत्र जनकपुरधाम: मधेश प्रदेशका मुख्यमन्त्री सतिश कुमार सिंहले अस्पताल अनुगमन पछि जनताको अर्को चासोको विषय रहेको जनकपुरधामका विभिन्न होटलहरूको अनुगमन सुरु गर्नु भएको छ।
होटलहरूमा सफा, स्वच्छ तथा स्वस्थ खानाको अभाव रहेको गुनासो बढे पछि उपभोक्ताको स्वास्थ्य सुरक्षालाई ध्यानमा राख्दै होटल अनुगमन थालिएको सी. एम.सिंहले बताउँदै सम्बद्ध सरकारी निकायले अनुगमनलाई निरन्तरता दिने प्रतिबद्धता व्यक्त गरेका छन्।
प्रदेश सरकारको भूमि व्यवस्था, कृषि तथा सहकारी मन्त्रालय, खाद्य प्रविधि तथा गुण नियन्त्रण कार्यालय जनकपुरधाम र घरेलु तथा साना उद्योग कार्यालयको संयुक्त टोली सँगै मुख्यमन्त्री सिंहले जनकपुरधाम स्थित होटल जानकी भ्यू, हंसराज स्विट, लक्ष्मी मिष्ठान्न भण्डार र रघुपति मिष्ठान्न भण्डारको निरीक्षण गर्नु भएको छ।
अनुगमनका क्रममा टोलीले विभिन्न होटल र मिठाइ पसलहरूबाट स्वास्थ्यका लागि जोखिमपूर्ण सामग्रीहरू बरामद गरी नष्ट गरेको छ। हंसराज स्विटबाट ११ प्याकेट म्याद गुज्रिएको मःम, न्यू जानकी भ्यू होटलबाट गन्हाएको एक बाल्टिन तरकारी, कीरा लागेको दाल तथा खुला ठाउँमा राखिएको तरकारी, र लक्ष्मी मिष्ठान्न भण्डारबाट कीरा परेको १० किलो मैदा बरामद गरी नष्ट गरिएको साना उद्योग तथा घरेलु कार्यालय जनकपुरधामका प्रमुख सन्तोष साहले जानकारी दिनुभयो।
अनुगमनको नतिजा अनुसार जनकपुरधाममा निरीक्षण गरिएका १० होटल मध्ये रघुपति मिष्ठान्न भण्डार मात्र सफा र मापदण्ड अनुरूप रहेको पाइएको छ।
आफ्नो प्रतिकृया दिनुहोस्